Shkarkohet drejtori i KESH. Ja kush e zëvendëson…

Ministrja e Infrastrukturës dhe Energjetikës, Belinda Balluku, ka shkarkuar sot drejtorin e KESH, Agron Hetoja.

Mesohet se në vend të tij është emëruar Drejtori i Fondit Kombëtar të Zhvillimit, Benet Beci.

Përveç fortunës së shkarkimeve që po kryen ministrja Balluku ndaj “drejtorëve të Gjiknurit”, drejtori i shkarkuar i KESH, Agron Hetoja  është akuzuar që nga dita e parë e ardhjes në detyrë në shtatorin e vitit 2013, por, ai ishte i paprekshëm.

Është akuzuar për importe të dyshimta të energjisë elektrike edhe kur Fierza ishte në kuotat optimale, ka blerë energji nga Serbia ndërkohë ka depozituar në Maqedoni dhe Kosovë, tregtinë me EFT-në dhe përmbytjen e Shkodrës me qëllim përfitimi, akuza këto që nuk janë hetuar dhe për të cilat nuk ka dhënë njeri përgjigje nga viti 2013 deri më sot.

Së fundi një raporti I KLSH paralajmëron falimentin dhe sekuestron e KESH me Humbja mbi 7 milionë euro. Korporata Elektroenergjetike Shqiptare po shkon drejt falimentimit, madje rrezikohet edhe vendosja e sekuestros së llogarive të saj nga kreditorët.

Raporti i Kontrollit të Lartë të Shtetit, për auditin e KESH për periudhën prill-dhjetor 2017, ngre shqetësimin e situatës financiare të shoqërisë. KLSH parashikon që për 2017, humbjet e shoqërisë të arrijnë deri në 7 miliardë lekë, për shkak të thatësirës hidrike dhe çmimit të shitjes së energjisë që nuk mbulon kostot e operimit.

Sipas KLSH, shqetësuese janë edhe kreditë e marra nga KESH, që po provokojnë një borxh tej mundësive të saj ekonomike.

Pas auditit, KLSH arrin në konkluzionin se KESH rrezikon të falimentojë dhe në një të ardhme jo të largët është e riskuar edhe nga vendosja e sekuestros së llogarive.

Kontrolli i Lartë i Shtetit parashikon që humbjet e KESH për 2017-n të jenë në vlerën e 1,4 miliardë lekëve deri në 7 miliardë lekë. Arsyet e humbjeve janë për shkak të thatësirës hidrike dhe çmimit të shitjes së energjisë që nuk mbulon kostot e operimit.

Kontrolli i Lartë i Shtetit arrin në konkluzionin se situata financiare e shoqërisë është shqetësuese, madje KESH po shkon drejt falimentimit.

“Referuar bilancit menaxherial të shoqërisë, jo atij tatimor, situata financiare e kësaj shoqërie është jo vetëm shumë shqetësuese, por kapitali i saj riskon të kalojë në vlerë negative, pra, të falimentojë (në rastin me të mirë, falimentim i provokuar operacional), si rrjedhojë e veprimeve dhe mosveprimeve të organeve drejtuese dhe monitoruese të saj (ERE, MIE, Ministria e Financave, Këshilli Mbikëqyrës dhe KM)”, citohet në raport.

Për këtë, KLSH rekomandon që nga Këshilli Mbikëqyrës dhe Asambleja e Aksionerëve të analizohet situata ekonomiko-financiare e shoqërisë dhe të merren masa të menjëhershme që kjo shoqëri të mund të operojë dhe kryejë veprimtarinë e saj si një shoqëri publike shtetërore shumë e rëndësishme për ekonominë kombëtare.

Në raport, KLSH ngre edhe shqetësimin e kredive të marrë nga KESH, të cilat jo vetëm përkeqësojnë situatën financiare të shoqërisë, por rrezikojnë edhe vendosjen e sekuestrove të llogarive.

“Mbingarkimi me kredi vazhdon të rëndojë akoma më shumë situatën ekonomike të shoqërisë, duke provokuar një borxh tej mundësive ekonomike të saj. Në këto kushte, në opinion të grupit të auditimit, KESH SHA në një të ardhme jo të largët është i riskuar për vendosje sekuestro të llogarive të saj”, citohet në raport.

KLSH rekomandon, që në vijimësi KESH të kërkojë trajnime nga qeveria për implementimin e një sistemi kontrolli dhe menaxhimi financiar.

KLSH shprehet se çështja e detyrimeve të ndërsjellta mes tri kompanive energjetike, KESH, OSHEE dhe OST, ka mbetur ende e pazgjidhur edhe pas urdhrit të Kryeministrit në 2015 për shlyerjen e detyrimeve të prapambetura dhe moskrijimin e detyrimeve të reja.

“Shoqërisë i kanë borxhe në vlerën 57,914,948,000 lekë. Vetë shoqëria ka borxhe ndaj të tretëve në vlerën 54,263,851 mijë lekë. Pra, shoqërisë në balancë i detyrohen të tretët në vlerën 3,651,097,000 lekë (57,914,948,000 lekë minus 54,263,851,000 lekë”, thekson raporti.

Por as pas këtij raporti nuk u shqetësua Edi Rama me shokë. Vetëm ndryshimet në Qeveri bënë që Agron Hetoja të shkarkohet duke i shpëtuar përgjegjësive në KESH, për drejtësinë nuk është se po mërzitet njeri në Shqipëri!

Ndryshe, drejtori i KESH, Agron Hetoja është drejtori i radhës i shkarkuar nga Ministrja e Infrastrukturës dhe Energjetikës, Belinda Balluku, pas drejtorit të ARSH, Afrim Qëndro, drejtorit të OST, Klodian Gradeci dhe drejtorit të Portit të Durrësit, Afrim Bakaj.