Tuz, partitë shqiptare me një listë të përbashkët

Partitë shqiptare në Tuz kanë arritur marrëveshjen për të dalë me një listë të përbashkët për zgjedhjet lokale të 3 marsit.

Pas mbledhjes së zhvilluar është arritur marrëveshja dhe Unioni Demokratik i Shqiptarëve, i është bashkuar Forumit Shqiptar, i cili përbëhet nga Alternativa Shqiptare dhe Lidhja Demokratike Shqiptare.

Lajmin e ka bërë të ditur përmes një postimi në rrjetin social Facebook, kryetari i Alternativës Shqiptare, Nik Gjeloshaj duke shtuar se së bashku me diasporën e realizuam Komunën e Malësisë, ndërsa bashkimi jonë ishte obligim moral dhe kombëtar.

“Me kënaqësinë më të madhe, dëshiroj të ndaj me Ju lajmin që Alternativa Shqiptare dhe Lidhja demokratike shqiptare arriten të përfundojnë me sukses misionin e filluar për bashkimin e subjekteve shqiptare, për zgjedhjet lokale të 3 marsit!”

Ja postimi i plotë:

Me kënaqësinë më të madhe, dëshiroj të ndaj me Ju lajmin që Alternativa Shqiptare dhe Lidhja demokratike shqiptare arriten të përfundojnë me sukses misionin e filluar për bashkimin e subjekteve shqiptare, për zgjedhjet lokale të 3 marsit!

ASH, LDSH dhe UDSH i bashkoi Malësia dhe rëndësia e këtij procesi hisorik zgjedhor!
Të gjithë ne , së bashku me diasporën e realizuam Komunën e Malësisë, ndërsa bashkimi jonë ishte obligim moral dhe kombëtar.

Ne mendojmë që me këtë veprim, realizuam me sukses Kërkesën bazë të qytetarëve shqiptarë! Jemi të sigurtë që ky unifikim, përveç qytetarëve do të përkrahet fuqishëm edhe nga diaspora jonë e nderuar, kudo ndodhet. 
Prezenca e tyre këtu në Malësi, do t’a konfirmoj angazhimin tonë të përbashkët për një Malësi shqiptare për jetë e mote! 
Ju nuk jeni kurrsyer, asnjëherë për asnjë çështje kombëtare, andaj jemi të sigurtë që edhe për Malësinë tonë të dashur, do të jepni maksimumin që të dalim faqebardhë edhe me 3 mars!

Pavarësisht kritikave që kemi pasur, kjo klasë politike që sot bashkon shqiptarët në një koalicion, e ka dëshmuar se e don Malësinë, e kemi dëshmuar se kemi kapacitet t’a drejtojmë dhe ruajmë Malësinë, amanet ashtu si na e lanë të parët! Sinqerisht,
Nik Gjeloshaj