Shpërthim i fuqishëm në Podgoricë, një i vdekur

Një makinë ka shpërthyer në qendër të kryeqytetit të Malit të Zi, Podgoricë, ku ka mbetur i vrarë  një person.

Fjala është për Nikolla Çupiqin, 34 vjeç, nga Cetinja, raporton televizioni publik i Malit të Zi, RTCG, duke ju referuar burimeve nga policia ndërsa shton sekemi të bëjmë me një person “interesant për sigurinë”.

Jozyrtarisht theksohet se nën makinën e Çupiqit, tip Toyota, me targa të Cetinjës, ishte vendosur një bombë e cila kishte shpërthyer në momentin kur ai ishte nisur nga vendparkimi, rreth orës 10:45.

Pas shpërthimit, Nikolla Çupiq është transportuar në Urgjencë ku pas përpjekjeve për reanimacion ai ka ndërruar jetë.

Drejtori i Qendrës së Urgjencës, Nermin Abdiç tha për RTCG se një person mashkull, ishte sjellë në gjendje shumë të rëndë, dhe mjekët bënë përpjekje për reanimacion.

Nikolla Çupiq, sipas dëshmitarëve okularë, nga fuqia e shpërthimit kishte  dalë nga xhami ndërsa banorët e zonës kanë dëgjuar edhe disa shpërthime pas atij të parit që ishte shumë i fuqishëm.

Shpërthimi ishte shumë i fuqishëm dhe është dëgjuar në pjesën më të madhe të kryeqytetit të Malit të Zi, raporton RTCG. Autoritet janë në vendin e ngjarjes dhe hetimet vazhdojnë.