Haradinaj: Platforma për dialogun gati; Limaj: Nesër në Parlament!

Kryeministri i Kosovës, Ramush Haradinaj, tha se pas konsultimeve me Ekipin negociator në dialogun me Serbinë, është rënë dakord që Platforma e Dialogut të kalojë në Parlamentin e Kosovës, raporton RFE.

“Përfundimisht kemi një dakordim për platformën e Kosovës në dialog. Tani, procedurë tjetër është konfirmimi nga vetë delegacioni shtetëror që të mund të kalojë në Parlament. Mendoj se platforma është një dokument i qëndrueshëm i parimeve dhe qëndrimeve që ka Kosova në dialog. Buron nga Kushtetuta, i obligohet dhe mbron Kushtetutën e vendit, personalisht i jap përkrahje,” tha Haradinaj pas takimit që zhvilloi me Ekipin negociator, ku tha se morën pjesë edhe krerët shtetërorë. .

Ai shtoi se platforma është shumë e rëndësishme për të ardhmen e dialogut për normalizimin e marrëdhënieve midis Kosovës dhe Serbisë, andaj bëri thirrje që edhe opozita të ketë zërin e saj.

“Edhe nëse Lidhja Demokratike e Kosovës dhe Vetëvendosje nuk marrin pjesë direkt në delegacion, mendoj se ata mund ta japin kontributin e vet, qoftë duke përkrahur platformën apo duke dhënë mendimet e tyre për platformën”, tha Haradinaj.

Ekipi negociator i Kosovës bashkëkryesohet nga Fatmir Limaj, nga Nisma Socialdemokrate, dhe Shpend Ahmeti i Partisë Socialdemokrate.

Limaj, sot pas takimit tha se kanë marrë mbështetje të plotë institucionale ndaj draft-platformës së hartuar për vazhdimin e dialogut me Serbinë.

“Në orë 15:00 Delegacioni pritet ta miratojë dhe nesër do ti dërgohet Kuvendit. Tema ka qenë plaftorma dhe jo tema të tjera, shpresojmë që edhe parlamenti do të kontribuoj Në këtë platformë. Nuk besojmë që nuk do të përkrahet sepse platforma është në përputhje me interesant e Kosovës”, tha Limaj pas takimi me Presidentin, Kryetarin e Parlamentit dhe Kryeministrin e Kosovës

Ndërkohë Haradinaj, i pyetur nëse deklaratat e presidentit të Kosovës, Hashim Thaçi, se mospezullimi i taksës 100% mbi prodhimet e imporrtuara nga Serbia dhe Bosnje e Hecegovina, i dëmton raportet me Shtetet e Bashkuara të Amerikës, ai tha se askush nuk është zëdhënës i SHBA-së”.

“Amerika flet vetë, as presidenti, as unë, as askush nuk është zëdhënës i Amerikës. Nuk kanë nevojë që dikush të flasë për ta, ata flasin vetë, dinë të flasin, i shpjegojnë gjërat”, tha Haradinaj.

Shtetet e Bashkuara e kanë bërë të qartë në disa raste se taksa, e vendosur qysh në nëntor, është kundër interesave amerikanë.

Vazhdimi i dialogut ndërmjet Kosovës dhe Serbisë, sipas zyrtarëve të BE-së që janë ndërmjetësues të procesit, mbetet i paqartë, përderisa Kosova e mban në fuqi taksën doganore.

Presidenti i Serbisë, Aleksandar Vuçiç, është shprehur se dialogu nuk vazhdon pa u hequr taksa.