Mbyllet Protesta e Madhe, Basha: Kjo Kryengritje do të vazhdojë deri në përmbysjen e Edi Ramës!

Mbyllet Protesta e Madhe e opozitës me falënderim dhe mirënjohje nga kryetari i Partisë Demokratike, Lulzim Basha, për mundin, sakrificën dhe qëndresën e të gjithë qytetarëve, duke u zotuar se kjo kryengritje qytetare do të vazhdojë deri në përmbysjen e Edi Ramës.

“Ndaj, dua sot në emër të opozitës t’u shpreh mirënjohjen më të thellë qindra mijëra shqiptarëve që i dhanë zë revoltës dhe kryengritjes qytetare. Le të zotohemi sot se kjo kryengritje qytetare do të vazhdojë deri në përmbysjen totale të këtij sistemi të kalbur dhe t’ju ftoj të enjten në orën 10:00 në protestën tjetër më të bashkuar dhe të vendosur se kurrë,” tha Lulzim Basha duke i garantuar pjesëmarrësve të protestës se do të vazhdojnë të jenë të vendosur kundër qeverisë hajdute ndërsa përfundoi:

“Ditën e enjte, populli do t’i japë një përgjigje tjetër narkoshtetit duke marrë fatin në duart e tij. Ndaj ju ftoj të gjithëve, duke u falenderuar nga zemra për këtë qëndresë të jashtëzakonshme të jemi edhe më shumë edhe më të vendosur edhe më të bashkuar të enjten e javës së ardhshme.”