Çmendet Presidenti i Greqisë, Pavlopulos: Çamët ishin kriminelë!

Presidenti i Greqisë Prokopis Pavlopulos akuzoi Shqipërinë se vazhdon të kërkojë të drejtat e çamëve, që ai i cilësoi si “kriminelë dhe bashkëpunëtorë të nazistëve.”

Dhe  jo vetëm kaq! Me një gjuhë të ashpër dhe të pa dëgjuar nga një president normal, ai me tone kërcënuese ndaj Tiranës vlerëson kërkesat e saj si të pakonceptueshme, dhe Shqipërinë pa perspektivë.

“Nuk ka perspektivë, ecuri të Shqipërisë fqinje drejt zonës evropiane,  kur për fat të keq, ende edhe sot nuk i ka braktisur kërkesat e pakonceptueshme të gjoja të drejtave të çamëve kriminelë, bashkëpunëtorë të nazistëve. Çfarë duhet të bëjmë, t’u japim të drejtë bashkëpunëtorëve të nazistëve?! Jemi absolutisht të sinqertë, qëndrimi ynë nuk ka asgjë hakmarrëse. Qëndrimi ynë kërkon respektin e së drejtës dhe të historisë,” tha Prokopis Pavlopoulos.

Edhe më parë, raporton OraNews, kreu helen ka theksuar se Greqia nuk e kundërshton anëtarësimin e Shqipërisë në Bashkimin Europian, ndërsa kujtoi respektimin e plotë të së Drejtës Ndërkombëtare dhe Europiane. Pavlopulos i bëri deklaratat nga Konica ku mori pjesë në kremtimet për 106-vjetorin e çlirimit të saj nga osmanët. Ndërsa foli përpara të pranishmëve, ai kërkoi edhe zbatimin e plotë të “Marrëveshjes së Prespës”.