Pritet arrestimi Dakos/ Pas paralajmërimit, Basha: Kjo nuk e shpëton Edi Ramën…
Pas takimit me krerët e degëve të PD së Tiranës, kryetari Lulzim Basha duke konfirmuar së këto takime intensive në Partinë Demokratike janë në funksion të aksionit opozitar, ndërkohë paralajmëroi arrestiin e Vangjush Dakos ndërsa për Edi Ramën kishte mesazh të qartë se asnjë përpjekje fasadë nuk do ta shpëtojë dot nga përgjegjësia politike dhe ligjore që ka sepse ai është kapur duke vjedhur zgjedhjet me bandat e krimit të organizuar.
“Orët e fundit janë intensifikuar informacionet se po përgatitet arrestimi i Vangjush Dakos. Do t’jua them qartë shqiptarëve se arrestimi i Vangjush Dakos duhet të kishte ndodhur që kur “Dosja 339” faktoi që ai, bashkë me hierarkë të tjerë socialistë, me emër dhe mbiemër, janë kapur në përgjime zyrtare të Prokurorisë duke bashkëpunuar me krimin e organizuar për të tjetërsuar votën e qytetarëve të Durrësit dhe të gjithë Shqipërisë.”
Mosarrestimi është bërë me urdhër të Edi Ramës, tha Lulzim Basha, për të mos arrestuar Vangush Dakon:
“Edi Rama, madje, flijoi edhe një nga benjaminët e tij, Fatmir Xhafën. Ndaj, arrestimi i Vangjush Dakos duhet të ndodhë, absolutisht, një orë e më parë, por nuk e shpëton urdhëruesin e krimit të të gjithë krimeve, bashkëpunimit të hapur të sektit kriminal të Rilindjes me organizatat e narkotrafikut, nga Avdylajt në Shijak te Bajrat në Shkodër, Çelët e Sanxhaktarët në Elbasan, Shullazi me shokë në Tiranë e kudo që ndodhen. Nuk e shpëton Edi Ramën.”
Është e njëjta levizje që bëri pas protestës së studentëve, me zevëndësimin e gjysmës së kabinetit me figurina dhe kukulla të tij, por që shqiptarët e kuptojnë se problemi zgjidhet vetëm me largimin e Edi Ramës, konstaton lideri i Opozitës duke shtuar se ai mund ta flijojë Gjush Dakon, i cili e ka vendin prapa hekurave dhe uron që ai të arrestohet që sonte:
“Mund të shkojë deri në flijimin e njerëzve të tjerë më të afërt të tij, të kapur në bashkëpunim me krimin e organizuar, por asgjë nuk ndryshon në vendosmërinë e opozitës së bashkuar dhe, jam i bindur, edhe në besimin më të thellë të qytetarëve shqiptarë, të djathtë e të majtë, se vendi nuk mund të mbetet më peng i një njeriu të kapur në vjedhje votash me krimin e organizuar dhe që, pastaj, ka plaçkitur Shqipërinë,për të pasuruar veten e tij dhe një grusht oligarkësh e kriminelësh.”
Edi Rama duhet të largohet. Mjaft është mjaft! Nuk ka zgjidhje tjetër, përveçse largimit të Edi Ramës, një qeverie tranzitore me njerëz të palidhur me krimin, padyshim, nisjes së hetimeve dhe përfundimit të tyre me sukses, thekson kryetari i Partisë Demokratike, pra, t’i zgjidhen duart prokurorisë dhe gjykatat të bëjnë punën e tyre, sa here që të kemi raste të politikanëve që kanë bërë pazare me krimin e organizuar dhe kemi jo pak.
Pra, beteja po avancon. Po avancon edhe aty ku, i strukur në vrimën e miut nga frika, është gati të dorëzojë bashkëpunëtorët e tij në krim, vlerësoi kryetari i PD, Lulzim Basha, duke ftuar qytetarët dhe në veçanti faktorin ndërkombëtar të mos gënjejë veten, se shqiptarët nuk i gënjen dot më, ndërsa përfundoi:
“Edi Rama duhet dhe do të largohet. Me Edi Ramën në krye të vendit, Shqipëria nuk do të bëjë asnjë hap përpara dhe opozita do të vazhdojë e vendosur betejën e saj deri në largimin e kapobandës dhe çlirimin e Shqipërisë, demokracisë dhe të Partisë Socialiste.”
