Pas takimit me Të Dërguarin e BE, Basha: Patjetër duhet të shembim sistemin e Edi Ramës!

Pas takimit që Drejtori i Përgjithshëm për Politikat Europiane e Fqinjësi dhe Negocimet e Zgjerimit, Christian Danielsson, zhvilloi me krerët e opozitës në Tiranë, kryetari i Partisë Demokratike, Lulzim Basha tha se Opozita e Bashkuar kërkoi që jo thjeshtë të largohet Edi Rama por të shembet ky sistem

“Opozita ka pasur sot një mundësi tjetër për të shprehur jo thjeshtë dhe vetëm vendosmërinë e saj për të çliruar Shqipërinë nga një qeverisje e korruptuar, pra kemi kërkuar që jo thjeshtë të largohet Edi Rama por të shembet ky sistem. Kujto që kujtdo që i dhimbset ky vend, duhet të garantojmë që mos kapen zgjedhjet dhe të mos përsëritet fenomeni Rama me emër tjetër. Të kemi institucionet kushtetuese të jenë në shërbim të njerëzve dhe jo të gjithë në grushtin e një njeriu dhe oligarkëve.”

Me këtë rast, lideri i opozitës, Lulzim Basha, përsëriti se regjimin e Edi Ramës opozita e konsideron të mbaruar, një kufomë politike:

“Na duhet patjetër të shembim këtë sistem, problemet e të cilit ndodhën që në vitin 2008 me ndryshimet kushtetuese, pra me qëllimin për të larguar kriminelët nga zonat elektorale, por fuqizimi i rolit të kryetareve solli më shumë kriminel në parlament. Në e konsiderojmë regjimin e Edi Ramës të mbaruar, një kufomë politike.”

Ndryshe, në përpjekje për të ndihmuar në zgjidhjen e krizës politike në Shqipëri si I Dërguar i BE, Drejtori i Përgjithshëm për Politikat Europiane e Fqinjësi dhe Negocimet e Zgjerimit, Christian Danielsson, ka zhvilluar takime me kryeministrin Edi Rama dhe krerët e Opozitës së Bashkuar,
dhe pritet që në fund edhe ai të shprehë qëndrimin e BE në lidhje me krizën politike që u krijua dhe po thellohet në Shqipëri .