Vuçiç: Çështja e Kosovës, më e vështirë se në kohën e Çosiqit dhe Gjingjiçit
Presidenti i Serbisë, Aleksandar Vuçiç, tha se propozimi i tij për çështjen e Kosovës vjen në një kohë kur situata në Kosovë është dhjetë herë më e vështirë se sa në kohën e Dobrica Çosiqit (ish president i Jugosllavisë 1992-1993) dhe Zoran Gjingjiçit ( ish kryeministri serb i vrarë në vitin 2003).
Ai dhe se Çosiq dhe Gjingjiç kishin shumë më tepër në duart e tyre por se ata ishin të arsyeshëm dhe e kuptuan atë që po ndodhte duke ofruar diçka edhe pse në ato momente kanë pasur edhe zgjidhje më të mira.
“Në kohën e Çosiqit ne kishim kontrollin policor dhe ushtarak në Kosovë, në kohën e Gjingjiçit nuk e kemi pasur deklaratën e pavarësisë dhe as vendimin e Gjykatës Ndërkombëtare të Drejtësisë. Nuk kemi pasur kufijt në Jarinjë dhe Bërnjak” tha Vuçiç për televizionin serb “Prva”.
Megjithatë, presidenti i Serbisë, tha se në thelb dialogu me përfaqësuesit e Prishtinës është më larg se kurrë më parë ndërsa shfaqi frikën se as në një të ardhme të afërt nuk do të ketë vazhdim të dialogut.
Bashkimi Evropian si ndërmjetësues i dialogut, por edhe Shtetet e Bashkuara janë duke i bërë presion Prishtinës dhe Beogradit që të arrijnë një marrëveshje gjithëpërfshirëse ligjërisht obliguese ndërmjet dy vendeve.
Brukseli dhe Washingtoni kanë thënë se iu mbetet palëve në dialog të vendosin modalitetet e marrëveshjes.
Mirëpo, dialogu në Bruksel është ndërprerë për shkak të Beogradi nuk dëshiron vazhdimin e tij përderisa autoritetet në Prishtinë nuk e heqin tarifën prej 100 përqind për mallrat serbe, të vendosur në nëntor të vitit të kaluar.
Por, kryeministri i Kosovës, Ramush Haradinaj po e kundërshton heqjen e saj derisa Serbia ta njohë pavarsinë e Kosovës.
Tash e sa muaj Beogradi dhe Prishtina po akuzojnë njëra tjetrën se po kushtëzojnë vazhdimin e dialogut
SHBA dhe BE po i bëjnë thirrje Qeverisë së Kosovës që së paku të pezullojë tarifën për një periudhë 120 ditor në mënyrë që t’i hapet rruga vazhdimit të dialogut.
Partneri i koalicionit qeverisës në Kosovë, Partia Demokratike e Kosovës po e përkrahë këtë ide mirëpo kundërshtuesi më i madh i saj mbetet kryeministri ,Ramush Haradinaj, që vjen nga Aleanca për Ardhmërinë e Kosovës./RFE/
