Hagë, Gjykata e Apelit: Radovan Karaxhiç dënohet me burg të përjetshëm

Gjykata e Apelit në Hagë e dha vendimin përfundimtar duke dënuar Ish-Presidentin e Republikës serbe të Bosnjes, Radovan Karaxhiç, me burg të përjetshëm.

Gjykata e Apelit në Hagë ishte dakord me Prokurorinë se dënimi me 40 vjet është joadekuat duke pasur parasysh veprat kriminale të Radovan Karaxhiçit, dhe se vendimi i shkallës së parë është i pakuptimtë  dhe i padrejtë.

Gjykata e Apelit vendosi se Prokuroria nuk ka arritur të dëshmoj gabimin e Gjykatës së shkallës së parë për vendimin se nuk kishte qëllime gjenocidale të Karaxhiçit për krimet në 7 komuna në Bosnje Hercegovinë.

Përveç një kërkese të Karaxhiçit e cila u pranua pjesërisht (Nr.31) të gjitha pikat tjera të Apelit të tij janë hedhur poshtë.

Ndryshe, në vitin 2016 Radovan Karaxhiç është dënuar me 40 vjet burg, duke u shpallur fajtor për gjenocid në masakrën e Srebrenicës më 1995. Në këtë vend janë vrarë më shumë se 8.000 burra dhe djem myslimanë nga forcat serbe të Bosnjes, duke shënuar mizorinë më të keqe në Evropë pas luftës së dytë botërore. Karaxhiç ishte shpallur fajtor edhe për organizimin e rrethimit të Sarajevës, që ka rezultuar me gati 10.000 persona të vdekur. Më shumë se 100.000 persona janë vrarë dhe rreth 2.2 milionë të tjerë janë detyruar të largohen nga shtëpitë e tyre gjatë Luftës në Bosnje, në periudhën 1992-95.