“Dhëmb për dhëmb”/ Bregu i Lumit, tërhiqet policia…

Pas një përleshje të fuqishme për rreth 3 orë të banorëve të Bregut të Lumit me Policinë e Shtetit, kjo e fundit është tërhequr nga shembja e banesave për zgjatimin e Bulevardit të Ri.

Kjo është tërheqja e tretë e IKMT dhe Policisë, Forcave Speciale e Shqiponjave, pas përplasjes me banorët e Bregut të Lumit, të cilët duke kundërshtuar shembjen e shtëpive, kërkojnë kompensimin e tyre.

Fjala është për 38 shtëpi që nuk janë kompensuar nga shteti ndërkohë që 2014 kanë përfituar kompensimin, pavarësisht se janë pjesë e të njejtit projekt.

Enkelejd Alibeaj: Dhëmb për dhëmb!

Ish-Deputeti i Partisë Demokratike, Enkelejd Alibeaj duke iu bashkuar protestës së banorëve të Bregut të Lumit që kundërshtojnë prishjen e banesave për zgjatimin e Bulevardit të Ri, tha se me bandat duhet të përballen vetëm dhëmbë për dhëmb. Kjo mënyrë, sipas tij, funksionoi me banorët e Unazë së Re dhe do funksionojë edhe me banorët e Bregut të Lumit.

“Ju mendoni se bandat njohin orar zyrtar? Bandave dhëmb për dhëmb. Dy duar për një kokë. Kjo është e vetmja zgjidhje dhe që funksionon. Funksionoi tek Astiri, do funksionojë këtu dhe për gjithë shqiptarët.”

Ndryshe, një grup Ish-deputetësh të PD u nisën drejt banorëve të Bregut të Lumit, pas përfundimit të mbledhjes së kryesisë së Partisë Demokratike.

Ndërkohë protestës u janë bashkuar, që në momentet e para Ish- deputetët Jorida Tabaku dhe Klevis Balliu.

Ndryshe, sot, përplasja e policisë me banorët e Bregut të Lumit që preken nga zgjatja e Bulevardit të Ri, ishte shumë më e ashpër se sa në dy rastet e para kur si IKMT ashtu edhe policia kishin ushtruar dhunë dhe terror psikologjik por kishte munguar përgjigja si kjo e sotmja.