Erdogan: Sistemet ruse S-400 së shpejti në Turqi

Presidenti turk, Recep Tayyip Erdogan tha sot se sistemet ruse për mbrojtje ajrore mund të arrijnë në Turqi më shpejt se që është planifikuar, pavarësisht pse një blerje e tillë ka nxitur debate me anëtarin tjetër të NATO-s, Washingtonin, raporton RFE.

“Dorëzimi i sistemeve ajrore S-400 ishte planifikuar të ndodhte në muajin korrik, mirëpo ato mund të arrijnë më herët,”tha Erdogan pas udhëtimit që ka realizuar në Rusi.

Ndryshe, Shtetet e Bashkuara i kanë kërkuar Ankarasë që të anulojë marrëveshjen me Rusinë duke thënë se sistemet ruse nuk janë në përputhshmëri me sistemet e NATO-s dhe janë konsideruar rrezik për aeroplanët amerikanë të llojit, F-35.

Më 1 prill, Washingtoni është shprehur se do të ndalojë dërgimin e këtij lloji të aeroplanëve në Ankara, pas vendimit të Turqisë për të vazhduar me blerjen e sistemeve ajrore ruse.

Mediat ruse kanë raportuar se Turqia synon të blejë katër sisteme ruse S-400 në vlerë të 2.5 miliardë dollarëve.

Nga ana tjetër, ministri i Jashtëm turk, Mevlut Cavusoglu, sot në një intervistë televizive tha se shteti i tij do të shikojë “diku tjetër” nëse Shtetet e Bashkuara nuk pranojnë që t’i shesin aeroplanët ushtarakë, F-35. Madje, Cavusoglu shtoi se Turqia po ashtu do të konsiderojë blerjen e më shumë sistemeve ruse, S-400 nëse nuk mund të blejë edhe sistemet Patriot.

Në Moskë, zëdhënësi i Kremlinit, Dmitry Peskov tha se Rusia është e “hapur” për një blerje të dytë.

Marrëdhëniet e Turqisë me Rusinë kanë qenë historikisht të tensionuara, mirëpo Moska dhe Ankaraja kanë krijuar lidhje të forta ekonomike prej përfundimit të Luftës së Ftohtë.

Nën udhëheqësinë e presidentit turk, Erdogan dhe homologut të tij rus, Vladimir Putin, këto dy shtete kanë rritur bashkëpunimin dhe kanë tensionuar lidhjet qoftë Rusia me Perëndimin ashtu edhe Turqia me SHBA dhe Bashkimin Evropian.