Maqedoni e Veriut/ Dalin rezultatet e para, Reka: Udhëheqim në të gjitha komunat shqiptare
Sipas të dhënave të Komisionit Shtetëror të Zgjedhjeve të Maqedonisë së Veriut, të publikuara në faqen e internetit, e të cilat përpunohen në vazhdimësi, kandidati i partive në pushtet, Stevo Pendarovski është në epërsi ndaj Gordana Siljanovskës të opozitës maqedonase, VMRO DPMNE dhe Blerim Rekës të opozitës shqiptare, raporton RFE.
Nga rreth 62 për qind të vendvotimeve të numëruara, Pendarovski ka fituar rreth 45 për qind të votave, Gordana Siljanovska rreth 42 përqind dhe Blerim Reka afër 12 përqind.
Por, pavarësisht kësaj , dy partitë VMRO dhe LSDM bazuar në të dhënat e tyre partiake pretendojnë fitore në zgjedhjet presidenciale.
VMRO DPMNE tha se në shumë komuna kandidatja e kësaj partie për presidente shteti, Gordana Jankullovska, po udhëheq kundrejt kandidatëve të saj dhe se në zgjedhjet e së dielës sipas opozitës maqedonase “ka ngadhënjyer drejtësia ndaj pushtetit jopopullor”.
“Gëzohu Maqedoni! Pushteti jopopullor është gjunjëzuar. Po udhëheqim në shumë komuna. Populli po fiton. Gordana Siljanovska është zgjedhja e popullit, Populli është i mençur, energjik dhe çdoherë ka të drejtë. Përkundër presioneve të pushtetit, në përgjithësi kishim procesi zgjedhor të paqësor. Erdhi drejtësia kundrejt padrejtësisë. Maqedoni kundër Veriores. Po ndodhë pranvera maqedonase”, ka deklaruar Igor Janjushev sekretari i përgjithshëm i VMRO DPMNE-së
Edhe LSDM ndërkohë thotë se kandidati i saj është në epërsi, por pa dhënë detaje mbi numërimin e votave. Nga partia e kryeministrit, Zoran Zaev thonë se Stevo Pendarovski në balotazh më 5 maj do të shpallet president i ri i shtetit.
“Stevo Pendarovski është në epërsi dhe fitorja në rrethin e parë është më se e qartë. Mbështetja e të gjitha bashkësive etnike pritet të konfirmohet me fitoren në rrethin e dytë. Pa dyshim se Stevo Pendarovski do të jetë president i ri i shtetit”, ka deklaruar Aleksandar Kiracoski.
Kandidati shqiptar për president, Blerim Reka, tha se është i kënaqur nga rrjedha e votimit dhe rezultati i arritur.
“Në të gjitha komunat shqiptare udhëheqin 3 me 1 në raport me kandidatët e tjerë. Vota kemi fituar edhe në komuna. Koncepti jonë “Republika për të gjithë” ka marrë mbështetje edhe në ato komuna ku nuk kemi shtrirje partiake. Kjo jep shpresë se Maqedonia do të jetë shtet i të gjithëve. Me votat e siguruara ne kemi deligjitimuara partitë tjera shqiptare, dhe kjo paralajmëron një pranverë politike”, ka deklaruar Reka.
Procesi i votimit për zgjedhjen e presidentit të ri në Maqedoninë e Veriut ka përfunduar në orën 19:00.
Komisioni Shtetëror i Zgjedhjeve ka bërë të ditur se deri në orën 18.30 të drejtën e votës e kanë shfrytëzuar 39.71 përqind e trupit të përgjithshëm votues, apo rreth 600 mijë qytetarë nga afër 1.8 milion me të drejtë vote.
Bazuar në rrjedhën e procesit, sipas KSHZ-së, dalja në votime në këto zgjedhje pritet të arrijë pak mbi 40 për qind. KSHZ-ja ka bërë të ditur se procesi zgjedhor u zhvillua kryesisht në atmosferë të qetë dhe demokratike.
Ndryshe, Presidenti mund të zgjidhet në raundin e e parë, nëse ndonjëri nga kandidatët merr mbi 50 për qind të numrit të përgjithshëm të votave nga lista votuese, apo rreth 900 mijë, që praktikisht tashmë është e pamundur dhe në balotazh, më 5 maj do të kalojnë dy garuesit me numrin më të madh të votave.
