Kim Jong Un në Rusi

Udhëheqësi i Koresë së Veriut, Kim Jong Un, ka hyrë në territorin e Rusisë, një ditë para takimit me presidentin e Rusisë, Vladimir Putin, raporton RFE.

Agjencia ruse e lajmeve Interfax bëri të ditur se Kim Jong un u prit në stacionin Khasan të rajonit Primorye, nga Zv/ministri i Jashtëm, Igor Morgulov, ambasadorin rus në Korenë e Veriut, Aleksandar Matsegora dhe zyrtarë të tjerë.

Si zakonisht, rruga e Kim zgjat më shumë pasi ai udhëton me tren dhe jo me ndonjë mjet tjetër udhëtimi.

Zyrtari i Kremlinit, Juri Ushakov, ka sqaruar se “Putin dhe Kim do të diskutojnë përpjekjet politike dhe diplomatike për të zgjidhur çështjen bërthamore në gadishullin Korean”.

Takimi do të realizohet në kohën kur administrata e Presidentit amerikan, Donald Trump, po përpiqet të sigurojë një marrëveshje për t’iu dhënë fund tensioneve bërthamore me Korenë e Veriut.

Dy takimet e mëhershme Trump-Kim nuk kanë arritur të prodhojnë ndonjë marrëveshje për çarmatosjen e Gadishullit Korean.