Ndryshon Kodin Penal/ Kërcënimi, Rama: Burg, kush bllokon rrugët!
Sot kur u paralajmërua se kryeministri Edi Rama do të prezantoj në mbledhjen e Grupit Parlamentar të Partisë Socialiste ndryshimet në Kodin Penal, ku theks të veçantë do ti kushtohet sigurisë ushqimore pas zbulimit të skandaleve të fundit, askush nuk e kishte të qartë se kujt do ti hyjë në punë një ndryshim në Kod kur ai nuk zbatohet.
Por, ku fle lepuri, Edi Rama e tha menjëherë pas kërcënimeve me burg që bëri për ata që abuzojnë me shëndetin, dhunojnë njerëzit në krye të detyrës apo shkelin fushat e futbollit.
Ndryshimet e reja në Kodin Penal, sipas Edi Ramës, pritet të ashpërsojë ndëshkimet për protestat në rrugë. Dhe, pikërisht sot kur opozita bllokon 12 akse kombëtare në të gjitha qarqet e vendit, dhe radhët e opozitës janë shtuar, Kryeministri, Edi Rama, kërcënon me burg:
“Kujtojnë se do të ngrenë njerëz për të shkatërruar dhe djegur godinat e institucioneve, duke shpresuar se do të prodhojnë dëshmorë të revolucionit të tyre imagjinar, si pasojë e reagimit, të pritshëm prej tyre, disporpocional të Policisë së Shtetit dhe të Gardës së Republikës, që në kohën e tyre u përgjigjeshin me kallashnikov protestuesve paqësorë. Por gjetën vetëm disa të verbër, që sot janë në burg për shkak të tyre dhe morën dhe do të marrin mbrapsht, deri kur të vazhdojnë kështu, vetëm përgjigjen proporcionale të forcave të rendit, asgjë më shumë dhe asgjë më pak,” tha Edi Rama duke menduar se çdo protestë që organizohet në këtë vend merr direktiva të ngjashme me ato të protestave rilindase, për të shkatërruar dhe djegur institucionet. Dhe jo vetëm kaq!
Që gjithë këto ndryshimenë Kodin penal i ka inicuar vetëm për protesta e opozitës flet edhe masa e shtuar e dënimit në Kod për subjektet që tregtojnë produkte që dëmtojnë shëndetin e konsumatorëve. Çdo person që do të cënojë sigurinë ushqimore do të rrezikojë 10 vite burg. Absurdi i kësaj mase qëndron në faktin se sipas Kodit Penal aktual, parashikohet gjobë deri në 2 vite burg dhe në rastet e bashkëpunimit deri në 10 vite burg dhe ndërsa nuk është dënuar asnjeri me 2 vite burg për 6 vite të qeverisjes rilindase kur dhe ka lindur me të madhe kontrabanda e mishit, Edi Rama sot flet për 10 vite burg.
“Ia kanë hedhur 30 vjet me gjoba që s’janë asgjë, krahasuar me fitimet e tyre, por kjo s’mund të vazhdojë dhe s’do vazhdojë më kështu. Këtyre forcave të së keqes në shoqërinë tonë, që guxojnë të kërcënojnë shëndetin e fëmijëve tanë dhe të të gjithë atyre që në këtë vend jetojnë dhe konsumojnë ushqim, duhet t’u rezervojmë ndëshkimin më shembullor të heqjes së lirisë së aktivitetit dhe të lirisë individuale, gjithashtu,” tha Edi Rama duke marrë asnjë përgjegjësi si për degradimin e AKU-së ashtu edhe kontrollit të ushqimit ndërsa flet edhe për neglizhencën mjekësore, neglizhencë kjo që lulëzoi tek spitalet private të miqëve të tij, sapo erdhi në pushtet:
“Në rastet e neglizhences mjekësore, do të ketë heqje lirie kur shkaktohet vdekja e personit nga arsye objektivisht të provuara.”
Qershia mbi tortë ishte dhuna në stadiumet e futbollit. Edi Rama bëri reforma të thella për sigurinë në stadiume që prodhuan dhunë, dhe sot këtë dhunë e kërcënon me burg:
“Goditja e trajnerëve dhe arbitrave do të dënohet me burg. Ashpërsim të mëtejshëm të do të ketë për mbajtjen e armëve.”
Duke paralajmëruar burg edhe për mbrojtjen e të drejtës së autorit dhje ata që mbajnë armë pa leje, Drafti i mazhorancës pritet të diskutohet me grupet e interesit dhe më pas në Komisionet parlamentare.
