Helmimi në Bulqizë/ Analizat, rezultati: Nuk ka ardhur nga uji i pijshëm!

Instituti i Shëndetit Publik, ISHP, publikoi rezultatet e një prej analizave të ujit të pijshëm marrë në rrjetin ujësjellës, që dyshohet të ketë shkaktuar disa simptoma në banorët e “Lagjes së Vjetër” në Bulqizë.

“Përgjigja e mostrës së sjellë nga Shërbimi i Sëmundjeve Infektive, Njësina Vendore e Kujdesit Shëndetësor Bulqizë, në laboratorin e ISHP, ka dalë negative për ngarkesë mikrobiologjike, pra nuk ka ndotje mikrobiale,” bënë të ditur ISHP.

Për një përgjigje më të plotë për shkaktarin e simptomave tek qytetarët e Bulqizës do të priten rezultate të tjera të analizave nga mostrat e marra nga grupi i ISHP në Bulqizë.

“Nga ana e specialistëve të ISHP në zonën ku janë paraqitur më shumë raste, janë marrë mostra uji në rrjetin ujësjellës, këto mostra janë në proces analizimi për parametrat mikrobiologjik, fiziko-kimik dhe toksikologjik (metalet e rënda dhe pesticidet), këto analiza pritet të dalin në ditët në vijim,” thekson ISHP. 

Ndryshe, gjatë fundjavës dhe ditën e hënë numri i të helmuarve në Bulqizë shkoi në 113.