Raportimi i zyrtarëve, ILDKPKI: 53 raste në Prokurori, Tatime dhe tek pastrimi i parave

Në vitin 2018 ILDKPKI raporton se janë referuar pranë Prokurorisë, Hetimit tatimor, Policisë së Shtetit si dhe Drejtorisë së Parandalimit të Pastrimit të Parave të paktën 53 raste zyrtarësh të ndryshëm.

Zyrtarët, sipas të dhënave të Inspektoratit të Lartë të Deklarimit të Pasurisë dhe Konfliktit të Interesit, i përkasin niveleve të ndryshme në administratë.

“Inspektorati i Lartë, gjatë periudhës 2014 – 2018 ka referuar pranë institucionit të Prokurorisë, strukturave të hetimit tatimor, Drejtorisë së Përgjithshme të Parandalimit të Pastrimit të Parave, si dhe Policisë së Shtetit 315 subjekte, në të cilat janë përfshirë zyrtarë të të gjitha kategorive dhe niveleve, si Deputetë të Kuvendit të Republikës së Shqipërisë, Kryetar Bashkie, Drejtorë Drejtorie etj. Për periudhën raportuese janë paraqitur në total 53 raste referimesh penale” thuhet në raportin e ILDKPKI për aktivitetin në vitin e shkuar.

I njëjti raport nënvizon se në një analizë të punës 5-vjeçare rezulton se, Inspektorati i Lartë ka aplikuar në total 1.672 masa administrative ndaj zyrtareve, si 140 masa administrative me “gjobë” në kuadër te ligjit nr. 60/2016 “Për Sinjalizimin dhe Mbrojtjen e Sinjalizuesve”.

“Në total për periudhën 2014-2018 rezulton të jenë aplikuar 1.812 masa administrative “gjobë”. Gjithashtu, rezulton të ketë referuar pranë Institucionit të Prokurorisë, Drejtorisë së Përgjithshme të Parandalimit të Pastrimit të Parave, Policisë së Shtetit, si dhe strukturave të hetimit tatimor në total 315 kallëzime penale dhe referime të tjera” vlerëson raporti.

Sa deklaruan pasurinë në vitin 2018

Gjatë vitit 2018, Inspektorati i Lartë ka vijuar punën me procesin e pranimit, regjistrimit dhe administrimit të deklaratave të interesave private, të subjekteve që mbartin detyrim për deklarim. Sipas ILDKPKI, nga të dhënat e regjistruara dhe të administruara nga Sektori i Protokoll-Arkivës dhe Administrimit të Deklaratave të Pasurisë, rezulton se numri i përgjithshëm i subjekteve (subjekte në funksion, ish-subjekte deklarues, kandidatë) deri më 31.12.2018 është 15.086 subjekte deklarues, nga të cilët: 17.8% ose 2.682 subjekte rezultojnë të jenë në funksion; 82% ose 12.373 subjekte rezultojne të jenë ish-subjekte deklarues; 0,2% ose 31 subjekte rezultojnë të jenë kandidatë.

Po kështu, numri i deklaratave të administruara nga Inspektorati i Lartë për vitin 2018, është 3.679 deklarata të interesave private, nga të cilat, të ndara sipas llojeve të tyre, rezultojnë këto të dhëna statistikore: Deklarata Periodike/Vjetore – 2.597 deklarata; Deklarata Para Fillimit të Detyrës – 532 deklarata; Deklarata Pas Largimit nga Funksioni – 534 deklarata; Deklarata Kandidati – 16 deklarata./Monitor/