Turistët e huaj: Polakët në rritje, shqiptarët e Kosovës po largohen…

Polakët kanë regjistruar rritje  në grupin e turistëve që kanë vizituar Shqipërinë në muajin Prill krahasuar me vitin e kaluar ndërsa shqiptarët e Kosovës, që qeveria e Edi Ramës vazhdon ti quaj të huaj, kanë pësuar rënie. Kështu dëshmojnë të dhënat e publikuara nga INSTAT për lëvizjen e shtetaseve të huaj dhe shqiptarë .

“Në prill 2018, ndër vendet që kanë hyrjet më të larta të shtetasve në Shqipëri, Polonia ka pasur rritjen më të madhe me 41,9%, ndërsa uljen më të madhe e kanë pasur shtetasit nga Zvicra me 25,2%. Në katërmujorin e parë 2018, ndër vendet që kanë hyrjet më të larta të shtetasve në Shqipëri, Polonia ka pasur rritjen më të madhe 33,0%”, raporton monitor të dhënat e INSTAT.

Shtetasit nga Kosova që kanë vizituar Shqipërinë në prill 2018 janë mbi 121 mijë, me një ulje prej 3.8% në raport me prill 2017.

Prilli në përgjithësi duket se ka pasur një braktisje nga shtetasit që vijnë drejt Shqipërisë nga vendet fqinje si Italia apo Greqia ku respektivisht kanë hyrë 7.1% më pak nga e para dhe 22.6% nga e dyta.

Referuar shifrave zyrtare, numri i shtetasve shqiptarë dhe të huaj që kanë hyrë në territorin shqiptar, në muajin prill 2018, është 781.404. Krahasuar me prill 2017, ky tregues rezulton me rritje 2,2%.

“Në prill 2018, numri i shtetasve të huaj të hyrë në vend është 351.610. Krahasuar me prill 2017, ky numër është ulur me 2,2%. Numri i shtetasve të huaj që kanë hyrë në vendin tonë në katërmujorin e parë e 2018 është 1.028.498, duke u rritur me 7,0%, në krahasim me të njëjtën periudhë të vitit 2017,” thekson Monitor.