Vuçiç: Koha të zgjedhim gënjeshtrën e ëmbël ose të vërtetën e hidhur

Presidenti i Serbisë, Aleksandar Vuçiç, në fillim të raportimit para Parlamentit foli për “disa” që bënë përpjekje për ta ndaluar të futet në Parlament duke i quajtur shumë të dobët dhe se kjo është e parëndësishme për qytetarët e Serbisë ndonëse ishin këta “disa” që javë më parë e gozhduan në Presidencë dhe për pesë orë qëndroi i ngujuar.  

Porosia e Vuçiçit ishte se ka ardhur koha që hapur të bëhet përzgjedhja në mes të gënjeshtrës së ëmbël dhe të vërtetës së hidhur, cila do qoftë ajo. Bisedimet Prishtinë-Beograd i vlerësoi shumë të rëndësishme, sepse sipas tij në këtë mënyrë kanë arritur ta kthejnë çështjen e Kosovës në tryezën e bisedimeve. Nëse ka kompromis, populli duhet të deklarohet dhe referendumi do të jetë i obligueshëm, tha Presidenti para deputetëve të Parlamentit të Serbisë i bindur se në këtë mënyrë do të marrin më shumë se sa që kishin.  

Në seancën e jashtëzakonshme të Parlamentit të Serbisë, ku ishte prezent edhe Kryeministrja Ana Brnabiç, falënderoi  të gjithë ata që dëshirojnë të bisedojnë në mënyrë të përgjegjshme për një problem, që ai e vlerësoi të rëndë për gjithë popullin serb.

Me këtë rast, ai tha, se duhet të japim përgjigje në një çështje shumë të rëndësishme, në çfarë besojmë, në gënjeshtrën ose të vërtetën.

“Pa e bërë këtë, nuk do të dijmë se sa jemi të aftë të bëjmë, ku janë kufijtë e vendit tonë dhe ëndërrave tona, ashtu si edhe realitetet tona. Pa e bërë këtë nuk do ta dijmë se ku është Kosova, ku është Metohia, kush i administron, ku jemi ne serbët në Kosovë dhe Metohi,” tha Vuçiç duke shtuar nëse mund të llogaritë Serbia edhe në të drejtën ndërkombëtare, kush janë miqtë tanë, a jemi miqtë e vetes tonë nëse refuzojmë të ballafaqohemi me të vërtetën.

Koha është që të përzgjedhim hapur gënjeshtrën e ëmëbl ose të vërtetën e hidhur.

“Detyra ime si President i Serbisë është që njerëzve tu them të vërtetën cila do qoftë ajo. Mos mendoni se nuk do të luftoj për popullin tonë dhe Kosovën më shumë se ata që të vërtetën e dinë por heshtin, dhe që mbajnë fjalime patriotike, e që fjalimet nuk do të duhet t’ia mbajnë askujt,” tha Vuçiç.

“Mund të jemi sa gjysma e shqiptarëve”

Fjalimin Vuçiç e vazhdoi me të kaluarën e Kosovës dhe ndryshimin e pushteteve të ndryshme, ndërsa foli edhe për ndryshimet demografike të cilat nëpër histori janë bërë dramatike për serbët. Lufta shumëshekullore është zhvilluar për Kosovën, por edhe për Vojvodinën dhe pjesë të tjera të Serbisë.

“Në disa prej tyre kemi fituar, e në disa kemi humbur,” tha Vuçiç duke shtuar se humbjet kurrë nuk i kemi pranuar edhe kur i kemi përjetuar disa herë në një kohë të shkurtër.

Nëse nuk ndryshojmë diçka, në vitin 2100 do të jemi dy herë më pak se sa shqiptarët që janë në Ballkanin Perëndimor,” tha Vuçiç ndërsa foli edhe për negociatat për Kosovën për dekada të tëra, shpalljen e pavarësisë së Kosovës, dialogun me ndërmjetësimin e BE-së i cili rezultoi me Marrëveshjen e Brukselit, por edhe në vështirësitë dhe presionet që kanë pasuar. Dialogu ishte i rëndësishëm, në interes të serbëve dhe shqiptarëëve, sepse është e rëndësishme që të arrihet paqja.

“A mund të arrijmë të gjitha që dëshirojmë, jo,” ishte i vetëdijshëm Vuçiç duke shtuar se ai nuk do të thotë të pavërteta si të tjerët .

“Por, do të fitojmë më shumë se sa që kishim, dhe për këtë jam i sigurt dhe i bindur, ” tha Vuçiç.

“Humbje e rëndë kombëtare”

Fuqitë evropiane dhe SHBA i kanë lejuar Kosovës që për gjashtë vjet të mos lejojnë themelimin e Zajednicës, që ishte detyrim shqiptar nga Marrëveshja e Brukselit, nuk reagojnë as me paralajmërimin e ri për formimin e “Shqipërisë së Madhe”, dhe do të ishte ndryshe sikur serbët të kishin folur për Republikën Srpska.

As Presidenti Macron dhe kancelarja gjermane Merkel nuk arritën të bindin shqiptarët për të hequr taksën prej 100 %, sepse ata e kanë mbrojtjen e dikujt më të fuqishëm.

Tha se është kundër idesë së ndryshimit të kufijve, nuk duhet ulur niveli në gjetjen e fajtorit të problemit të Kosovës dhe gabimet që e kanë shkaktuar. Por, duhet pranuar  se na ka ndodhur një humbje e rëndë kombëtare, se kemi humbur territorin, njerëzit, por kishim edhe humbje ekonomike dhe ishin të konsiderueshme, dhe para së gjithash   kemi humbur edhe vite të tëra ku jemi gënjyer.

Konfliktii ngrirë në mes të Serbisë dhe Kosovës nuk mund të ekzistoj si zgjidhje e përhershme sepse shqiptarët nuk e duan:

“Nëse konflikti i ngrirë mbetet, çështja është vetëm kur do ta sulmojnë shqiptarët Serbinë. Çështje e radhës është se si do të qëndrojmë ndaj sulmit shqiptar nëse ndodhë,” tha Vuçiç duke përmend dy skenare rreth zgjidhjes së çështjes së Kosovës: I pari është ruajtja e status quos dhe konfliktit të ngrirë për të cilin tha se është i pamundshëm të ruhet dhe tjetri është ai për të cilin ai personalisht angazhohet , normalizimi i marrëdhënieve Kosovë-Serbi.

Ky normalizim sipas tij mund të ndodhë ashtu siç e mendon bota, bashkësia ndërkombëtare dhe shqiptarët, arritja e marrëveshjes përmes së cilës Kosova është shtet i pavarur, ku serbët do të kishin ca të drejta ose sipas modelit të Gjermanisë, të cilën shqiptarët dhe amerikanët e kundërshtojnë, por kërkojnë njohjenn e pavarësisë nga Beogradi, që ne nuk e duam.

“Mundësia e dytë, të cilën e kemi lëshuar, është ajo për të cilën fola dhe për të cilën jamë sulmuar, ku është ofruar një lloj korigjimi i kufirit në mënyrë që të shpëtojmë qenien e shëndoshë në Kosovë, që të mbrojmë popullin nga dëbimi, që të mund të jetojmë qetë në të ardhmen.”

Në fund Presidentii Serbisë, Aleksandar Vuçiç tha se nëse heqet taksa do të bëjë gjithçka që është e mundur që të gjendet një zgjidhje, e nëse nuk e pranojmë kompromisin, i kemi humbur të gjitha.