Jo vetëm në Veri, Haradinaj: Zbatim i Ligjit, asgjë tjetër!

Pas fillimit të aksionit policor në Kosovë që Presidenti i Serbisë, Aleksandar Vuçiç alarmoi ndërkombëtarët se po zhvillohet kundër serbëve në Veri, reagon Kryeministri i Kosovës, Ramush Haradinaj, duke u shprehur se ky aksion është i shtrirë në të gjithë Kosovën.

Ramush Haradinaj sqaroi se ky aksion është i drejtuar ndaj individëve të përfshirë në kontrabandë, krim të organizuar dhe vepra të tjera kriminale.

“Si kryeministër i vendit, konfirmoj se bëhet fjalë për zbatimin të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin,” tha Haradinaj duke reaguar përmes rrjetit social Facebook duke saktësuar se disa prej personave të përfshirë në këto vepra janë zyrtarë doganorë, policë por edhe qytetarë të rëndomtë ndërsa përfundon:

” Ftoj serbët e veriut ta ruajnë qetësinë dhe ta respektojnë ligjin!”

Postimi i plotë i kryeministrit Haradinaj:

Me urdhër të Prokurorit, në gjithë Kosovën aktualisht është duke ndodhur një operacion policorë, i drejtuar ndaj individëve të përfshirë në kontrabandë, krim të organizuar dhe vepra të tjera kriminale.

Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë.

Operacioni u zhvillua me sukses edhe në Komunat Veriore të Kosovës.

Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër.

Ftoj serbët e veriut ta ruajnë qetësinë dhe ta respektojnë ligjin!