Video/ Lulzim Basha për DW: Kriza mund zgjidhet vetëm përmes….
Kryetari i PD-së Lulzim Basha, i cili ndodhet në Berlin duke marrë pjesë në Kongresin Ekonomik të Unionit Kristiandemokrat në bisedë për DW thekson, se opozita u përmbahet kërkesave të saj dhe se kriza mund të zgjidhet vetëm përmes marrjes së përgjegjësive politike, largimit të kryeministrit Rama dhe krijimit të qeverisë tranzitore për të shkuar drejt zgjedhjeve të reja.
“Kjo krizë mund të zgjidhet vetëm me standarde të aplikuara në Bashkimin Evropian. Në cilin vend të Evropës nuk do të kishte dhënë dorëheqje një kryeministër që është kapur bashkë me kupolën e tij duke asgjësuar procesin zgjedhor, që është kapur në afera të tmerrshme korruptive, ndërkohë që drejtësia duket se është paralizuar dhe nuk është në gjendje t’u japë përgjigje këtyre skandale,” u shpreh Lulzim Basha duke nënvizuar se kërkesa e vetme e cila ka gjetur mirëkuptim të plotë është përmbajtja e standardeve evropiane:
“Ne e kemi dëgjuar thirrjen e tyre për dialog. Kam pasur mundësinë të shpreh angazhimin total në emër të opozitës dhe Partisë Demokratike në veçanti për zgjidhjen e kësaj krize dhe kërkesa e vetme e cila ka gjetur mirëkuptim të plotë është përmbajtja e standardeve evropiane.
Pra standardet evropiane në këtë rast e parashtrojnë fare qartë zgjidhjen e kësaj krize. Ajo kalon përmes largimit të Edi Ramës, një qeverie tranzitore dhe garantimi i standardeve në radhë të parë.
Ndërkohë, PD dhe opozita ka një platformë që është pjesë e një dialogu kombëtar për një reformë të thellë kushtetuese për ndarje dhe balancim të pushteteve dhe kurrë më, Shqipëria të mos përfundojë në këtë situatë ku një grup njerëzish, një grup politikanësh, kriminelësh dhe oligarkësh sundojnë vendin.
Me shumë shpresë nga këto takime, se me ndihmën e partnerëve gjermanë dhe evropianë ne do të mund ta tejkalojmë këtë krizë dhe hapjen e dyerve të Evropës, por kjo kalon përmes marrjes së përgjegjësive politike nga shkaktarët e kësaj krize, largimi i Edi Ramës dhe një qeverie tranzitore”, u shpreh Kryetari i PD, Lulzim Basha.
DW: Ju mund t’i bëni të gjitha këto biseda edhe me Ramën. Ai ju ka bërë 7 letra deri tani.
Lulzim Basha: Kjo nuk është çështje personale midis meje dhe zotit Rama. Këtu bëhet fjalë për një qasje serioze dhe një përkushtim të dimensionit europian.
Prandaj, ndodhem sot unë këtu dhe jo zoti Rama. Prandaj ndodhem unë sot këtu si interlokutori i autoriteteve gjermane dhe i kapitalit te industrisë gjermane, sepse zoti Rama ka humbur shansin të tregojë seriozitet me përkushtimin ndaj standardit europian. Si mund të pritet nje zgjidhje përmes letrave, ndërkohë që nuk trajton problemet kryesore të krizës?
Problemi kryesor i krizës është një Parlament i dalë nga vota e vjedhur me krimin e organizuar. Problemi kryesor i krizës është rënia e të gjithë institucioneve të drejtësisë, kapja e te gjithë pushteteve në një dorë. Problemi kryesor i krizës është mungesa totale, siç vihet re edhe këtu, e investimeve perendimore apo i investimeve gjermane. Është rënia e ekonomisë ne duart e krimit të organizuar. Sot në Shqipëri aktiviteti kryesor ekonomik, është pastrimi i parave te pista. Shkaktari i këtyre problemeve nuk mund të jetë zgjidhja e këtyre problemeve. Ndaj, parashtrimi i opozitës, zgjidhja politike që ne kemi parashtruar është rruga e vetme për të shmangur konfliktin civil, për të shmangur çmendurinë e shkuarjes drejt zgjedhjeve fallco, moniste, prapë të diktuar nga krimi, prapë me kandidatë kriminelë dhe mbylljes përfundimtare të derës së Europës.
Ndaj, mund t’ju them nga Berlini, ju dhe teleshikuesve tuaj, se jam me shumë shpresë nga këto takime, tashmë në gjysmën e aktivitetit tim, – do të vazhdoj edhe gjatë pjesës tjetër të ditës, në takime të nivelit të lartë, – se me ndihmën e partnerëve gjermanë, me ndihmën e partnerëve europianë, ne do të mund ta tejkalojmë këtë krizë, do ta hapim rrugën e Europës. Por kjo kalon përmes marrjes së përgjegjësive politike nga shkaktarët e kësaj krizës, përmes largimit të Edi Ramës, një qeverie tranzitore dhe zgjedhjeve të lira e të ndershme.
DW: Këto janë çështje morale, që duhet ta zgjidhë secili me moralin e tij. Një dorëheqje është çështje morali…
Lulzim Basha: Në rastin konkret është çështje stabiliteti politik. Është çështje e së ardhmes europiane të vendit dhe nuk është vetëm çështje morale.
