Clinton: Kosova është krenaria ime, e dua këtë vend!

Ish-presidenti amerikan, Bill Clinton, në fjalën e tij para me rastin e 20 vjetorit të hyrjes së trupave të NATO-s në Kosovë tha se është nder i madh për të lidhja që ka me Kosovën.

“Çdo herë ka qenë dhe do të jetë nderi më i madh në jetën time, që kam qëndruar me juve kundër spastrimit etnik dhe ju jam shumë mirënjohës që jam sërish këtu me ju,” tha Clinton duke shtuar se duhet të jemi mirënjohës që në këtë rrugëtim të vështirë nuk ka pasur kthim të dhunës sistematike.

“Para se të mendoni për të gjitha gjërat që duhet t’i bëni, jeni mirënjohës që në udhëtimin tuaj të vështirë dhe të gjatë nuk ka pasur kthim të dhunës sistematike, shkatërrimit. Merita për këtë i shkon qytetarëve të Kosovës të të gjitha etnive, të cilët kanë vendosur të jetojnë me shpresën e të ardhmes së duhur,” tha Clinton.

Pas ceremonisë ku fjalën e rastit e mbajtën edhe liderët institucionalonal të Kosovës nga Sheshi “Skënderbeu” filloi marshimi “Ecja për Liri” drejt Sheshit “Albright”, afër American School of Kosova, ku u bë përurimi i bustit të Ish-Sekretares amerikane të Shtetit, Madeleine Albright.

Pas përurimit të bustit të Ish-Sekretares amerikane të Shtetit, Madeleine Albright, vepër kjo e skulputorit Luan Mulliqi, Sekretarja Albright duke falënderuar për nderimet u shpreh:

“Jam shumë e nderuar që të kem një bust në Prishtinë. Faleminderit shumë për këtë nder kaq të madh. Ky vend do të thotë shumë për mua,” tha e emocionuar, Ish-Sekretarja amerikane e Shtetit, Madeleine Albright.