Pas takimit me Bashën, Presidenti: Përgjegjshmëri…

Mëngjesi i sotëm i politikës shqiptare filloi me takimin e Presidentit të Republikës dhe Kryetarit të Partisë Demokratike, Lulzim Basha, në Presidencë.

Pas takimit, Ilir Meta, duke dhënë detaje ka sqaruar se zhvilloi një takim me Kryetarin e Partisë Demokratike, Lulzim Basha për të diskutuar mbi krizën aktuale që po kalon vendi:

“Kërkohet përgjegjshmëri dhe sjellje europiane nga të gjithë,” theksoi Ilir Meta përmes një postimi në rrjetin social Facebook.

Ndryshe, ky takim vjen pas ftesës që Presidenti i Republikës u bëri përmes një letre dy protagonistëve kryesor, Edi Rama dhe Lulzim Basha, me qëllim të uljes së tensioneve ndërsa vendi po i afrohet një date paligjshmërie dhe tensioni që i ndanë palët, dhe po e çon Shqipërinë drejt një konflikti civil, për të cilin ka paralajmëruar Presidenti Meta edhe kryesuesin e radhës së OSBE.

Kryeministri Edi Rama ka refuzuar takimin me arsyeimin se “është i zënë” ndërsa Ilir Meta ka deklaruar se e pret sot deri në orën 13:00 në Presidencë.

“Sot prita në një takim Kryetarin e Partisë Demokratike, z.Lulzim Basha për të diskutuar mbi krizën aktuale që po kalon vendi. Kërkohet përgjegjshmëri dhe sjellje europiane nga të gjithë.” shkruan Meta në profilin e tij në facebook

Kreu i shtetit iu drejtua dje përmes një letre dy aktorëve kryesorë politikë në vend, ndërsa i ftonte në takim për të biseduar për situatën politike në vend. Ndërsa Basha iu përgjigj me përpikmëri, ftesës së Kreut të Shtetit, kryeministri Edi Rama tha se nuk kishte kohë për një takim të tillë, pasi është i zënë me fushatën në kuadër të zgjedhjeve të 30 qershorit. Pavarësisht përgjigjes së kreut të qeverisë, Presidenti Meta u shpreh se mbetet në pritje të tij deri në 13:00, me shpresën se kryeministri do të gjejë kohën.