Ekipi Negociator Antikushtetues, Vetëvendosje: Zgjidhja e vetme: Zgjedhjet!
Pa vendimit të Gjykatës Kushtetuese i cili konfirmon pretendimet e Lidhjes Demokratike të Kosovës dhe Lëvizjes Vetëvendosje, se Ekipi Negociator është Antikushtetues, reagon deputetja e Lëvizjes Vetëvendosje, Albulena Haxhiu duke theksuar se tashmë zgjidhja e vetme është shkuarja në zgjedhje të jashtëzakonshme.
“Siç kemi thënë në kohën kur e kemi kontestuar ligjin për dialogun, projektligji për dialogun ka krijuar një delegacion jo kushtetues të cilit ja mveshën. Gjykata Kushtetuese sot konstatoi që ligji për Dialogun është anti kushtetues në tërësinë e tij,” tha Albulena Haxhiu.
Në vendimin e Gjykatës Kushtetuese thuhet se Delegacioni shtetëror, i cili është themeluar me Ligjin e kontestuar, nuk është i paraparë me Kushtetutë dhe nuk është i paraparë brenda formës së qeverisjes dhe ndarjes së pushtetit. Si i tillë, delegacioni shtetëror nuk mund të përfshihet në ndërveprimin e ndarjes, kontrollit dhe balancimit të pushteteve, gjegjësisht strukturën e ndarjes së pushtetit, sikurse është e përcaktuar me nenin 4 të Kushtetutës.
Dhe, Gjykata konstatoi se bartja e kompetencave të institucioneve kushtetuese tek “mekanizmi i posaçëm” i krijuar me Ligjin e kontestuar, është ndërhyrje në ushtrimin e kompetencave të institucioneve të përcaktuara me Kushtetutë dhe nuk është në pajtim me vlerat demokratike dhe të sundimit të ligjit, të përcaktuara me nenin 7 të Kushtetutës, sepse i mvesh delegacionit shtetëror funksione të cilat nuk përkojnë me dispozitat kushtetuese.
