Tregtarët serbë mbyllin dyqanet në veri të Mitrovicës

Dyqanet në veri të Mitrovicës janë të mbyllura, që nga mëngjesi i ditës së hënë. Në shenjë solidarizimi, nuk punojnë as kafiteritë, pikat e karburanteve dhe as taksitë.

Shtatë muaj pasi Qeveria e Kosovës vendosi një taksë prej 100 për qind, për mallrat nga Serbia dhe Bosnje e Hercegovina, Mitrovica e Veriut thotë se nuk ka më mallra për shitje, veçanërisht produktet e qumështit, miellit, vajit si dhe produkte tjera.

Përfaqësues i Shoqatës së Bizneseve nga veriu i Kosovës, Radosh Petroviç tha se dyqanet u mbyllën për shkak të taksës dhe pamundësisë së biznesmenëve nga veriu i Kosovës për t’u marrë me aktivitetet e tyre.

Ai nuk bëri të ditur se deri kur do të jenë të mbyllura dyqanet, duke thënë se kjo varet nga situata në terren.

“Mungesa është vërejtur gjatë shtatë muajve të fundit, por sot ka ndodhur kolaps i plotë, të gjitha shitoret janë mbyllur, edhe ato ushqimore, dhe në shenjë solidariteti janë mbyllur edhe të gjitha shitoret tjera,” tha Petroviç.

Siç tha ai, furrat e bukës do të punojnë me kapacitet të reduktuar dhe buka do të dorëzohet vetëm në spital, në Qendrën e Studentëve dhe në kopshte.

Autoritetet serbe kanë thënë vazhdimisht se veriu i Kosovës është i kërcënuar nga një “katastrofë humanitare”.

Ndërkaq, autoritetet e Kosovës kanë thënë se ky është vetëm inskenim i një krize humanitare.

Presidenti i Kosovës, Hashim Thaçi, ka deklaruar të hënën që ajo që po ndodh në pjesën veriore të vendit nuk mund të quhet krizë humanitare.

“Krizë humanitare nuk ka në Kosovë. Mund të ketë improvizim dhe tendenca të Serbisë, për t’i paraqitur si viktimë qytetarët serbë në veri të Kosovës. Prandaj, është shumë me rëndësi që e gjithë bota demokratike e njeh dhe e kupton realitetin, siç është edhe në veri dhe ky pretendim i ri i Serbisë është i dështuar”, ka thënë Thaçi.

Kryeministri Ramush Haradinaj, përmes rrjetit social Facebook, situatën e në veri të Kosovës, e cilësoi si simulim i katastrofës humanitare nga ana e Serbisë.

“Qeveria e Kosovës mbron qytetarët në veri, duke hapur pikat shitëse në bashkëpunim me bizneset kosovare. Simulimi i katastrofës humanitare nga ana e Serbisë, është një tjetër përpjekje e dështuar për destabilizim. Pas demaskimit të këtij skenari, të paralajmëruar kohë më parë, Qeveria e vendit, mbetet e përkushtuar për të ofruar siguri për gjithë qytetarët e saj, pa dallim,” tha Haradinaj.

Ministrja e Administrimit të Pushtetit Lokal e Qeverisë së Kosovës, Adrijana Hoxhiq, tha që mbyllja e lokaleve sot dhe planifikimi që kjo të ndodhë edhe nesër, është qartësisht protestë e paralajmëruar dhe është e qartë se për çfarë bëhet fjalë.

“Për sa u përket ditëve të kaluara, ka qenë e dukshme që në shitore mungojnë një numër artikujsh, të cilat më herët kanë qenë në rafte. Kështu që vet kjo situatë është e pakëndshme për njerëzit e thjeshtë. Po, ka pasur mungesa,” tha Hoxhiq.

Megjithatë, siç thotë Hoxhiq, tash për tash, “kjo situatë mund të vlerësohet si krizë humanitare”.

“Se sa do të zgjasë dhe cili do të jetë rezultati i gjë kësaj, këtë nuk e di. Është mirë që e dimë saktë se çfarë do të ndodhë sot dhe nesër dhe kjo është protestë e paralajmëruar. Të shohim se çfarë na pret të mërkurën”, theksoi Hoxhiq.

Ndërkaq, shitoret në vendbanimin e quajtur Lagjja e Bonjakëve, në Mitrovicë Veriore, punojnë. Ky vendbanim gjendet rreth 200 metra në afërsi të qendrës së qytetit. Pronarët shqiptarë të këtyre shitoreve, thonë që serbët nga pjesa veriore, tash për tash, tregtojnë pa ndonjë pengesë./RFE/