“Reçaku i trilluar”/ Akuzë ndaj Ish-ministrit Teodosijeviç

Prokuroria Speciale e Republikës së Kosovës tha se ka ngritur aktakuzë pranë Gjykatës Themelore në Prishtinë kundër të pandehurit Ivan Teodosijeviç, pasi që në cilësinë e Ministrit në Qeverinë e Kosovës, ka nxitur dhe përhapur publikisht urrejtje, përçarje dhe mosdurim midis grupeve kombëtare, racore dhe etnike, që jetojnë në Republikën e Kosovës, raporton RFE.

Ish-Ministri i Administratës së Pushtetit Lokal, Ivan Teodosijeviç, gjatë një organizimi me rastin e 20-vjetorit të ndërhyrjes së NATO-s në Kosovë në muajin mars, tha se “arsye për agresionin e NATO-s ka qenë e ashtuquajtura katastrofë humanitare në Kosovë dhe masakra e trilluar e Reçakut”.

“Me këto veprime I.T., ka kryer veprën penale: nxitje e urrejtjes, përçarjes ose mosdurimit kombëtar, racor, fetar apo etnik”, thuhet në njoftimin e Prokororisë.

Ndryshe, Kryeministri i Kosovës, Ramush Haradinaj, e ka shkarkuar nga detyra Teodosijeviçin më 9 prill. Ndërkohë më 25 mars, ai ka liruar nga detyra edhe Zv/ministren e Drejtësisë, Vesna Mikiç, pasi kjo e fundit ka deklaruar se bombardimet e NATO-s mbi caqet e ish-Jugosllavisë “ishin gjenocid ndaj shtetit dhe popullit serb”.