Reeker: SHBA nuk do të bëhen arbitër i politikave të brendshme të Shqipërisë

Ndihmës Sekretari amerikan i Shtetit Philip Reeker tha se Shtetet e Bashkuara nuk do të bëhen arbitër i politikave të brendshme të Shqipërisë.

Duke folur sot në një forum të organizuar nga Këshilli i Atlantikut në Washington, Ambasadori Reeker tha se Shqipëria vazhdon të jetë një ndër aleatet më të forta të Shteteve të Bashkuara në Evropën juglindore.

“Por ne nuk jemi krenarë me gjendjen aktuale politike në Shqipëri,” tha Ambasadori Reeker, zyrtar me përvojë në çështjet e Ballkanit duke shtuar se rruga institucionale është mënyra e vetme për tejakilimin e krizës së tanishme.

“Nuk jemi krenarë me shqiptarët këto javët e fundit, sepse ata nuk përdorën institucionet që kanë. Nuk mundet që thjesht të bojkotosh parlamentin ose të dorëzosh mandatet. Ato institucione duhen përdorur, duhen përdorur gjykatat, duhet të emërohen anëtarët e gjykatës kushtetuese, që përmes Kushtetutës dhe përdorimit të këtyre mjeteve të tejkalohen kohët e vështira politike.”

Duke e bërë të qartë se SHBA nuk do të bëhet arbiter i politikave të brendshme të Shqipërisë, Ndihmës Sekretari amerikan i Shtetit sqaron:

“Shtetet e Bashkuara nuk do të bëhen arbitër i politikave të brendshme të Shqipërisë, por ne do të vazhdojmë të inkurajojmë të gjitha palët të punojnë së bashku me institucionet dhe të bëjnë hapat e duhur që të ecin përpara.”

Por, Ndihmës Sekretari amerikan i Shtetit, Philip Reeker, ka dhe formulën nëse institucionet nuk funksionojnë:

“Dhe nëse institucionet nuk bëjnë punë, atëherë puno që t’i ndryshosh ato, nëpërmjet mjeteve kushtetutese që keni.”/VOA/