Presidenti Trump në votëbesim, dështon përpjekja!

Një përpjekje për të nisur procedurat për nxjerrjen në votëbesim të Presidentit amerikan, Donald Trump, u bllokua në Dhomën e Përfaqësuesve të SHBA-së, raporton RFE.

Demokrati nga Teksasi, Al Green, e paraqiti rezolutën, pasi Dhoma e Përfaqësuesve votoi për të dënuar sulmet verbale të Trumpit kundër katër kongresisteve amerikane.

Megjithatë, rezoluta e tij nuk siguroi mbështetje të mjaftueshme, pasi edhe demokratët votuan kundër saj.

Presidenti Trump tha se përpjekjet qesharake për ta nxjerrë atë në votëbesim tani “kanë marrë fund”.

“Kjo nuk duhet të lejohet kurrë që t’i ndodhë një presidenti tjetër të Shteteve të Bashkuara,” thekson Presidenti Trump përmes rrjetit social Twitter.

Përpjekja për votëbesim erdhi pasi Presidenti Trump përsëriti deklaratat kundër katër kongresisteve, Alexandria Ocasio-Cortez, Ilhan Omar, Ayanna Pressley dhe Rashida Tlaib, duke ju bërë të qartë:

“Shumë interesante të shohësh kongresistet ‘përparimtare’ demokrate, të cilat me origjinë vijnë nga vendet, qeveritë e të cilave janë katastrofë e plotë….dukë u thënë njerëzve në SHBA si duhet të udhëhiqet qeveria jonë.”

Presidenti Trump sqaroi përmes rrjetit social Twitter se “nuk ka kockë raciste” në trupin e tij, përkundër akuzave për racizëm.