Dokumenti/ Kolegjit Zgjedhor, PD: Pezulloni dhënien e mandateve për Këshillat Bashkiakë
Partia Demokratike i është drejtuar sot me një Letër Kolegjit Zgjedhor, ku i kërkon pezullimin e dhënies se mandatave për Këshillat Bashkiakë deri në vendimin e Gjykatës Kushtetuese.
“Shoqata e Bashkive ka depozituar në Gjykatën Kushtetuese një kërkesë për kushtetueshmërinë e votimeve të 30 Qershorit. Opozita: Pa u shqyrtuar çështja në Gjykatën Kushtetuese, Kolegji Zgjedhor ka pengesë ligjore për të bërë shpërndarjen e mandateve të Këshillave monopartiake Bashkiake,” theksohet në Letrën e sigluar nga Sekretari i Përgjithshëm, Gazment Bardhi, dhe duke cituar Kodin e Procedurës Civile shton se Kolegji Zgjedhor ka detyrimin ligjor të vendosë pezullimin e gjykimit, për shkak se çështja nuk mund të zgjidhet para se të zgjidhet një çështje tjetër.
Ligji detyron Kolegjin të mos marrë vendim pa u shprehur më parë Gjykata Kushtetuese mbi kushtetueshmërinë e Dekreteve të Presidentit, thekson Partia Demokratike duke konstatuar se standardet e shqyrtimit gjyqësor të mosmarrëveshjeve janë në rrezik nga presioni i vetingut mbi disa anëtarë të Kolegjit Zgjedhor.
“Vendimet e deritanishme të Kolegjit Zgjedhor, të pambështetura në ligj dhe të motivuara politikisht, sipas interesit të Qeverisë. Regjistrimi i paligjshëm i Bindjes dhe mohimi i opozitës për komisionerët, u konstatuan të paligjshme nga ODIHR,” theksohet në Letrën drejtuar Kolegjit Zgjedhor duke rikujtuar:
“Vetëm Gjykata Kushtetuese mund të shqyrtojë mënyrën e ushtrimit të kompetencave nga Presidenti, përfshirë dekretin e zgjedhjeve. Sa kohë janë në fuqi dekretet për zgjedhje në 13 Tettor mandatet e këshilltarëve bashkiakë nuk mund të shpërndahen.Janë fituar në votime të padekretuara nga Presidenti.”
Ky është një rast që Kolegji të mos lejojë zëvendësimin e pluralizmit me partinë shtet dhe demokracia me diktaturën, shprehet PD duke i bër apel Kolegjit Zgjedhor:
“Koha t’i shërbeni interesit publik përpara interesit tuaj privat, i cili po përdoret nga Rama për të krijuar drejtësinë e tij private, duke i shkaktuar Shqipërisë një dëm afatgjate.”
Ndryshe, PD i është drejtuar Kolegjit Zgjedhor para nisjes së shqyrtimit të shpërndarjes së mandateve të këshilltarëve bashkiakë, duke vënë në dijeni edhe të ODIHR, ONM, BE, dhe Ambasadave kryesore në Tiranë.
