KPA, shkarkohet Kryetari i Gjykatës së Lartë, Xhezair Zaganjori
Kolegji i Posaçëm i Apelimit, KPA, ka shkarkuar përfundimisht nga sistemi Kryetarin e Gjykatës së Lartë, Xhezair Zaganjori.
Pas provave të paraqitura nga subjekti i rivlerësimit, Trupi gjykues tha se Zaganjori nuk justifikoi pasurinë. KPA ka gjetur ndër të tjera problematika me deklarimin e një apartamenti në Durrës dhe pagesat e shkollimit të fëmijëve jashtë shtetit.
“Referuar deklaratës fillestare të 2013 dhe të vitit 2017, subjekti Xhezair Zaganjori është i pasaktë në deklarimin e sipërfaqeve, vlerës dhe burimit të këtyre pasurive të paluajtshme. Ai nuk arrin të justifikojë pasuritë. Për rrjedhojë ka kryer deklarim të pasaktë”, tha relatorja e seancës Albana Shtylla.
Pasuri si shtëpia, një dyqan, garazhi dhe një bibliotekë ishin gjetur me probleme nga verifikimi i Komisionerit Publik. Komisioneri Publik e ankimoi vendimin e Komisionit të Pavarur të Kualifikimit i cili e konfirmoi në detyrë, duke kërkuar shkarkimin e Xhezair Zaganjorit.
Me largimin e Zaganjorit, Gjykata e Lartë mbetet me vetëm një anëtar, Ardian Dvoranin, i cili merr drejtimin e institucionit.
Ndryshe, nga marsi i vitit 2018 kur nisi vettingu, nga detyra janë shkarkuar 7 gjyqtarë të lartë, për problemet me pasurinë dhe lidhje me eksponentë të krimit të organizuar: Admir Thanza, Artan Zeneli, Artan Broci, Shkëlzen Selimi, Tom Ndreca, Edmond Islamaj, Xhezair Zaganjori. Ndërsa më herët 5 të tjerë lanë detyrën me mbarimin e mandatit.
