Gati projektligji për shërbimet e pagesave, licencohen për herë të parë institucione të dedikuara
Ministria e Financave dhe Ekonomisë ka hartuar një projektligj “Për shërbimet e pagesave” që do të konsultohet me palët e interesit në vijim. Në relacionin që shoqëron projektligjin nënvizohet se për herë të parë sanksionohet krijimi i dhe licencimi i institucioneve të pagesave përbën një risi në tregun financiar shqiptar. “Aktualisht, veprimtaria e shërbimeve të pagesave dhe të transferimit të parave ofrohet nga bankat në zbatim të dispozitave të Ligjit për bankat dhe nga subjektet financiare jobanka dhe institucionet e parasë elektronike, të cilat janë licencuar për të kryer veprimtarinë e shërbimeve të pagesave dhe të transferimit të parave.
Në bazë të kuadrit ligjor dhe rregullativ në fuqi për shoqëritë e kursim-kreditit dhe unionet e tyre, veprimtarinë e shërbimit të pagesave dhe të transferimit të parave mund ta ushtrojnë edhe shoqëritë e kursim-kreditit. Bankat ushtrojnë edhe veprimtarinë e emetimit dhe të administrimit të instrumenteve të pagesës (të tilla si: kartat e kreditit dhe të debitit, çeqet e udhëtarit dhe çeqet bankare, kartat e pagesës dhe pagesat me celular etj.), përfshirë emetimin e parasë elektronike (neni 54, pika 2, shkronja “f” e Ligjit për bankat)” sqaron relacioni.
Kjo do të thotë se institucionet e pagesave pasi të licencohen nga Banka e Shqipërisë do të mund të ofrojë ato shërbime të caktuara të cilat janë të përcaktuara me ligj ndërkohë që i njëjti draft rregullon edhe marrëdhënien për aksionaret, mbikëqyrjen, detyrimet, të drejtat apo sanksionet në rastet kur shkelet ligji.
Shërbimet e pagesave
Por cilat janë shëbrimet që do të ofrohen nga institucionet e pagesave në kuptimin e projektligjit të ri të hedhur për konsultim. Referuar draftit renditen të paktën tetë të tilla.
- Shërbimet që mundësojnë depozitimin e parave fizike në një llogari pagese, si dhe të gjitha veprimet e nevojshme për funksionimin e një llogarie pagese.
- Shërbimet që mundësojnë tërheqjen e parave fizike nga një llogari pagese, si dhe të gjitha veprimet e nevojshme për funksionim e një llogarie pagese.
- Ekzekutimi i transaksioneve të pagesave, duke përfshirë transferimet e fondeve në një llogari pagesash të çelur pranë ofruesit të shërbimit të pagesave të përdoruesit ose pranë një ofruesi tjetër të shërbimit të pagesave:
- a) ekzekutimi i debitimeve direkte, duke përfshirë dhe debitimet direkte që bëhen vetëm një herë;
- b) ekzekutimi i transaksioneve të pagesave përmes një karte pagese ose nga një pajisje e ngjashme;
- c) ekzekutimi i transfertave të kreditit, duke përfshirë urdhërpagesat periodike.
- Ekzekutimi i transaksioneve të pagesave, ku fondet janë të mbuluara nga një linjë kredie për një përdorues të shërbimit të pagesave:
- a) ekzekutimi i debitimeve direkte, duke përfshirë debitimet direkte që bëhen vetëm një herë;
- b) ekzekutimi i transaksioneve të pagesave përmes një kartë pagese ose nga një pajisje e ngjashme;
- c) ekzekutimi i transfertave të kreditit, duke përfshirë pagesat periodike.
- Emetimi i një instrumenti pagese dhe/ose pranimi i transaksioneve të pagesave.
- Dërgesat e parave.
- Shërbimi i inicimit të pagesës.
- Shërbimi i informimit mbi llogarinë./Monitor/
