Abuzimi me legalizimet, numri dy i PS dorëzohet në polici
Pas disa ditësh që ishte shpallur në kërkim nga policia, numri dy i Partisë Socialiste të Durresit, Arben Isaku, është dorëzuar në polici.
Arben Isaku, i cili aktualisht mban postin e Zv/Drejtorit të Agjencisë Shtetërore të Kadastrës në Durrës, Kryetarit të Këshilltarëve të PS në Bashkinë Durrës, dhe Sekretar i Përgjithshëm i PS Durrës u shpall në kërkim të shtunën, me akuzën e korrupsionit dhe shpërdorimit të detyrës. Bashke me te, u vetëdorezua në polici edhe ekonomisti, shtetasi Redi. K, 27 vjeç.
Përgjimet e “Legalizimit”
Në kuadër të operacionit të koduar “Legalizimi”, zyrtarët akuzohen se kanë pajisur me leje legalizimi duke falsifikuar dokumentat dy shtetas për një sipërfaqe 123 metra katror dhe truall 500 metra katror në zonën e plazhit.
Arben Isakun është mbajtur për disa muaj në përgjim, nga ku ka rezultuar se në cilësinë e Drejtorit të ALUIZNI-t në Durrës ka legalizuar me tituj pronësie dy persona, të cilët kanë paraqitur dokumente të falsifikuara.
Kështu, janë pajisur me leje legalizimi duke falsifikuar dokumentat shtetasit Xh.N., 29 vjeç, banues në Durrës dhe E.S., 39 vjeç, banues në Berat, të cilët janë shpallur në kërkim dhe po punohet për kapjen e tyre pasi Prokuroria e Rrethit Gjyqësor Durrës ka nxjerrë urdhër ndalimi për veprën penale ” Vjedhja me pasoja të rënda” parashikuar në nenin 134/3 të Kodit Penal. Materialet i kaluan Prokurorisë së Rrethit Gjyqësor Durrës për veprime të mëtejshme.
