Gjermani, burri nga Kosova vrau ish-gruan dhe partnerin e saj

Dje rreth orës 14:20, në Iserlohn të Gjermanisë është raportuar për një vrasje të dyfishtë. Sipas agjencisë së lajmeve “DPA”, sulmi ka ndodhur nga një burrë 43 vjeçar i cili raportohet të ketë vrarë me thikë kuzhine ish-bashkëshorten e tij 32 vjeçe dhe një burrë tjetër 23 vjeçar, që mediat në Gjermani raportojnë të ketë qenë partneri i ri i viktimës.

Vrasësi dhe gruaja 32 vjeçe raportohet se janë nga Kosova, ndërsa 23 vjeçari nga Afganistani. Pas aktit, raporton KTV, autori është dorëzuar tek forcat policore menjëherë pa rezistencë.

Në bazë të autopsive që u janë bërë dy viktimave sot,del se ata kanë pësuar disa plagë të shkaktuara nga thika, e cila është konfiskuar në vend të ngjarjes.

Arsyeja e këtij sulmi nuk dihet, por çifti kishte kohë që jetonin të ndarë.

Gazeta gjermane “Bilt” raporton se në kohën e sulmit, të ndodhur në një stacion treni, viktima grua me vete kishte edhe beben e saj 2 muajshe (vajzë), e cila ka shpëtuar pa ndonjë lëndim.

“Në makinën e viktimës grua në kohën e krimit ishte një vajzë dy vjeçe. E bija e viktimave u shpëtua nga dëshmitarët. Foshnja u dërgua në spital pa lëndime dhe tani është nën kujdesin e zyrës për mirëqenie. Sipas gjendjes aktuale të hetimit, dyshohet se 23 vjeçari është babai i fëmijës”, raporton “TZ”.

Në kohën e aktit, afër vendit të ngjarjes ka pasur shumë dëshmitarë, përfshirë edhe një dasmë me rreth 20 persona.

Trupi i pajetë i gruas mbeti në një parking automjetesh, ndërkaq trupi i burrit mbeti në platformë.

“Stacioni është në qendër dhe në kohën e krimit ka pasur shumë persona afër,” tha një zëdhënës i policisë.

Mysafirët e dasmës kanë mbetur të tronditur nga ngjarja dhe janë strehuar në godinat e afërta.