Kundër Kosovës/ “Instituti Vlatacom” reagon por nuk mohon angazhimin e Cizelj për Serbinë

Drejtori i Kompanisë “Instituti Vlatacom”, Vladimir Cizelj, këtë vit nuk ka qëndruar në Francë, thuhet në një përgjigje të kësaj kompanie për RFE.

Një portal në Republikën e Afrikës Qëndrore ka shkruar se ministria e Jashtme e Serbisë, përmes një ndërmjetësuesi, në Paris gjatë muajit korrik të vitit 2019, i ka ofruar ryshfet ministres së Jashtme të Afrikës Qëndrore, Sylvie Baipo Temon, para vendimit të pretenduar për tërheqjen e njohjes së Kosovës.

Ndërkohë, Ministria e Jashtme e Kosovës, përmes një reagimi ndaj këtij shkrimi, tha se ky ndërmjetësues është Vladimir Cizelj.

“Në korrik, Vladimir Cizelj vizitoi Australinë, Filipinet dhe Japoninë”, thuhet në përgjigjen e kompanisë, drejtor i së cilës është Vladimir Cizelj.

“Vlatakom” nuk iu përgjigj pyetjes së RFE në lidhje me rolin e Cizeljit në fushatën e Serbisë për tërheqjen e njohjeve të Kosovës, por vetëm deklaroi se “Instituti Vlatacom” merret me teknologji dhe jo politikë.

Emri i Vladimir Cizelj u përmend në një deklaratë të lëshuar nga Ministria e Jashtme të Kosovës, më 26 gusht, ku u tha se Ministria e Jashtme e Serbisë po ofron ryshfet për shtetet në këmbim të tërheqjes së njohjes së Kosovës.

Sipas një investigimi të RFE, Vladimir Cizelj u punësua si Këshilltar Special në Ministrinë të Jashtme të Serbisë. Këtë e konfirmon një dokument i Kombeve të Bashkuar, ku emri i tij figuron si një nga delegatët e ministrisë serbe në një konferencë të Kombeve të Bashkuara.

Ministria e Punëve të Jashtme të Serbisë ende nuk u është përgjigjur akuzave se po përdor ryshfetin, si një mjet diplomatik, për të marrë nga vende të ndryshme nota diplomatike, për tërheqjen e njohjes së Kosovës./RFE/