Zyrtare/ Vetëvendosje nominon Albin Kurtin, kandidat për Kryeministër

Lëvizja Vetëvendosje ka nominuar kandidat për kryeministër, kryetarin e saj, Albin Kurtin.

Duke iu drejtuar delegatëve të Këshillit të Përgjithshëm, Kryetari i Lëvizjes Vetëvendosje shfaqi bindjen se një përmbysje e madhe në politikën e vendit po ndodh me këto zgjedhje. Është përmbysja e kapjes së shtetit dhe e logjikës së korrupsionit, karakterizuese e partive të vjetra.

“Më ndihmoni që të fitojmë me një diferencë të madhe në mënyrë që ndryshimi të jetë i madh dhe fitorja të jetë masive. Më ndihmoni të çlirojmë shtetin nga kapja. Më ndihmoni ta luftojmë pabarazinë, nepotizmin, korrupsionin dhe krimin e organizuar. Më ndihmoni të ndërtojmë një të ardhme ku të gjithë jetojnë në paqe, në siguri dhe me dinjitet,” tha Albin Kurti duke shtuar se ka ardhur koha që në Kosovë të përfundojnë qeverisjet e deritanishme, të cilat Kurti i quajti “qeverisje të këqija”.

Në fund, Këshilli i Përgjithshëm i Lëvizjes Vetëvendosje autorizoi Kryesinë e Lëvizjes për të bërë plotësimet e fundit në listën e kandidatëve për deputetë të miratuar në Këshillat e Qendrave të Lëvizjes dhe nga Kryetari Albin Kurti.