Më 6 Tetor, Veseli: Ja pse do të fitojë PDK…

Kryetari i PDK, Kadri Veseli sot ka shpalosur në Prishtinë vizionin e tij si Kryeministër para kandidatëve për deputet dhe ithëtarëve të partisë, ku vend i veçantë i është kushtuar rinisë, luftës kundër korrupsionit dhe të ardhmes së Kosovës në partneritet me SHBA dhe BE.

“Më 6 tetor, ne do të fitojmë për të mos i lënë të tjerët ta dështojnë Kosovën, ta izolojnë Kosovën, ta lënë Kosovën në stagnim e paqartësi.

Më 6 tetor, tha i bindur Kadri Veseli, PDK do të fitojë me besimin qytetar, për t’u treguar të gjithëve se ky vend ka shpresë:

“Se Kosova është besimi dhe jeta jonë, se burrat e gratë e Kosovës janë të zotë për ta  zhvilluar vendin e tyre.”

Më 6 tetor do të fitojmë, për t’u treguar të gjithëve se ata që promovojnë më shumë rininë dhe u japin atyre një shans të vërtetë, do ta udhëheqin vendin, tha kandidati i PDK për Kryeministër duke e bërë të qartë nuk mund të ndërtohet një e ardhme këtu nga ata që vënë në dilemë dhe cenojnë partneritetin me Shtetet e Bashkuara dhe Bashkimin Europian.

Dhe jo vetëm kaq! Nuk mund të ndërtohet një e ardhme këtu nga ata që nuk kanë vullnet dhe guxim për ta luftuar korrupsionin, nepotizmin dhe abuzimet me pushtetin.

“Nëse duam ta luftojmë korrupsionin, gjëja e parë është ta pranojmë problemin dhe ta fillojmë ndryshimin nga shtëpia. Sepse, të gjitha partitë e Kosovës kanë qenë dhe janë në pushtet dhe kanë bërë e po bëjnë gabime. Por, PDK është partia e vetme që ka edhe vullnetin, edhe guximin për t’i ndrequr këto gabime,” tha Veseli duke shtuar se PDK ka një plan si ta luftojë korrupsionin, si t’i mbajë të rinjtë në Kosovë, si ta ndërtojë një të ardhme.

“Ne do ta formojmë një Qeveri pa aktakuza. Një Qeveri që do të jetë e vogël në numër, por shumë efikase dhe përfshirëse në punë. Një Qeveri me Ministra të rinj që do të punojnë për qytetarët. Do të jetë Qeveria me më shumti të rinj ndonjëherë. Një Qeveri që nuk do të abuzojë me taksat e qytetarëve, por do t’i mbrojë ato. Duke lehtësuar bizneset ekzistuese dhe duke i ndihmuar ato të rejat; me një plan strategjik, të saktë dhe konkret, në përputhje me nevojat e qytetarëve, kërkesat e tregut dhe drejtimin zhvillues ekonomik.”

Shumë kohë para se ta dija se do të kishte zgjedhje, tha Kryetari i PDK, vendosa t’i largoj nga detyra këdo që kishte aktakuza për korrupsion dhe nepotizëm.

“Sepse, besova që për të bërë ndryshimin, duhet që ndryshimin ta fillojmë nga vetja.
Partitë tjera më shikuan, përfolën dhe akuzuan, por ju po e shihni se efekti po arrihet,” tha Veseli ndërsa foli edhe për promovimin e të rinjëve të cilëve ua dhënë shansin dhe ata e dëshmuan veten duke shpëtuar miliona euro nga Buxheti i Kosovës, duke e luftuar korrupsionin dhe i kthyen ato në të mira për qytetarët.

“Të dashur qytetarë, bashkë-partiakë të nderuar; Unë i kam hyrë garës për Kryeministër me një qëllim të qartë: Kosova nuk guxon të kthehet pas. Kosova nuk guxon të ndalet. Kosova nuk guxon të qëndrojë e izoluar. Kosova duhet të ecë përpara,” tha kandidati për Kryeministër i PDK, Kadri Veseli, duke i bërë thirrje të gjithëve që të bëhen bashkë ndërsa përfundoi:

“PDK është familja juaj. Është zëri juaj.
Është forca juaj. Dhe, unë si Kryeministër i Kosovës, jam gati që bashkë me ju, ta bëjmë më të mirën për atdheun tonë. Ta ndërtojmë të ardhmen.  Për ty. Për shtetin.
Urime. Fitore!