Prokurori i “Dosjes 184”, në krye të Prokurorisë Dibër

Pas largimit të Esmaralda Keshit nga drejtimi i Prokurorisë së Dibrës, për shkak të aplikimit për anëtar të Këshillit të Lartë të Prokurorisë, KLP e zëvendësoi me prokurorin Rifat Kojku. Aktualisht ai është zëvendësdrejtues i kësaj prokurorie dhe prokuror i “Dosjes 184” e cila kaloi në Dibër për kompetencë.

“Me 8 vota pro miratohet caktimi i përkohshëm i prokurorit Rifat Kojku në pozicionin e drejtuesit të Prokurorisë pranë Gjykatës së Shkallës së Parë Dibër,” bënë të ditur KLP.

Dosja “184”, e konsideruar edhe si dosja e blerjes së votave, nuk kaloi pa u komentuar në Dibër, ndërsa të tre prokurorët që janë në detyrë në këtë Prokurori, u shprehën se ishin në konflikt interesi.

Megjithatë, dosja tashmë është marrë nën hetim nga Kojku dhe prokurorja tjetër. Ndërkohë, Esmeralda Keshi, që prej fillimit shpalli konfliktin e interesit, pasi në përgjimet e kësaj dosjeje ka dalë edhe një person, me të cilin ka lidhje familjare.