Opinioni Final/ Komisioni i Venecias: Shkarkimin e Presidentit e ka në dorë…
Komisioni i Venecias ka publikuar sot Opinionin Final për veprimin e Presidentit të Republikës Ilir Meta me anulimin e datës së zgjedhjeve vendore 30 Qershor.
“Në përgjigje të kërkesës për një mendim nga Kryetari i Parlamentit të Shqipërisë, Komisioni i Venecias arrin në përfundimin se, në mungesë të një dispozite ligjore për këtë çështje, Presidenti mund të anulojë zgjedhjet vetëm për organet e qeverisjes vendore në situata që plotësojne kriteret për marrjen e masave emergjente. Edhe atëherë Presidentit i duhet një bazë specifike – ad hoc – e ligjshme për të shtyrë zgjedhjet.”
Për pretendimin e Ilir Metës se veproi në kushtet e emergjencës në të cilën ndodhej vendi, duke shtyrë datën e zgjedhjeve për në 13 tetor Komisioni i Venecias shprehet:
“Ky përfundim mbështetet nga rregulli i përgjithshëm interpretues, sipas të cilit rregullimi i shprehur i kompetencave të emergjencës në Kushtetutë dhe ligjet e kufizon përdorimin e çdo fuqie plotësuese të pashkruar të emergjencave në situata shumë të jashtëzakonshme; kryesisht për situata me pamundësi faktike ose juridike të cilat nuk parashikohen në mënyrë të qartë nga ligji i shkruar i emergjencës.”
Komisioni i Venecias nuk jep një opinionin nëse anulimi dhe shtyrja e zgjedhjeve lokale është shkelje e Kushtetutës nga ana e Presidentit, ndonëse këtë e kishte kërkuar shoku Gramoz, por Komisioni thekson se kjo do të jetë në dorën e Parlamentit dhe në fund, Gjykatës Kushtetuese:
“Do të jetë në dorën e Parlamentit dhe në fund të Gjykatës Kushtetuese të përcaktojnë nëse anulimi, në rastin konkret shtyrja e zgjedhjeve lokale është një shkelje e Kushtetutës nga ana e Presidentit dhe nëse shkelja është e një karakteri serioz, i cili do të lejonte një fajësim të Presidentit,” theksohet në opinionin final duke shtuar:
“Edhe sikur të vërtetohej serioziteti i shkeljeve, kjo nuk do të duhej domosdoshmërisht të çojë në një fajësim të Presidentit, duke pasur parasysh fuqinë e seancës plenare të Kuvendit për t’u kujdesur për qëllimet kushtetuese, siç janë kontrollet dhe ekuilibrat.”
