Seanca plenare/ Parlamenti miraton projektligjin për Korporatën e Investimeve

Parlamenti i Shqipërisë ka miratuar sot me 77 vota për Projektligjin e shumë debatuar të Korporatës së Investimeve Shqiptare.

Kundër kësaj nisme ishin vetëm 19 deputetë ndërkohë 3 abstenuan.

Sot në seancë plenare është miratuar edhe Ligjit për buxhetin faktik të vitit 2018, për të cilin votuan 79 deputetë, 20 ishin kundër dhe 3 abstenuan.

Ndryshe, me Korporatën e Imvestimeve, si burim tjetër i keqpërdorimit financiar pas PPP-ve, Qeveria angazhohet të krijojë një ndërmarrje të re publike, e cila do të përdorë pronat shtetërore për të realizuar vetëm apo me partnerë privatë investime që janë rentabël dhe nxisin zhvillimin ekonomik.

Lista e pronave është e shkurtër deri tani sipas Ministrisë së Financave. Zonat e lira ekonomike, dhe dy-tre prona të tjera të identifikuara. Vetëm funksionimi i korporatës do të ketë një buxhet prej rreth 3 milionë euro.

Drafti fillestar për krijimin e Korporatës së Investimeve hasi kundërshti të mëdha nga BE, dhe institucionet financiare ndërkombëtare.

Fillimisht qe parashikuar që kjo ndërmarrje shtetërore të mos i nënshtrohej rregullave t prokurimit publik. Por tani qeveria thotë se ka reflektuar.

Sipas Ministrisë së Financave korporata do jetë subjekt kontrolli nga KLSH dhe do i nënshtrohet ligjit të prokurimit publik, kur prokuron fonde shtetërore dhe rregullave të donatorëve kur përdor paratë e tyre.