Pas dështimit/ Akuza, Balla: PD doli hapur kundër detyrave të Bundestagut

Kryetari i Grupit Parlamentar të Partisë Socialiste, Taulant Balla, duke prezantuar në Elbasan vendimin e Kryesisë së PS për bashkëdrejtimin e Organizatave Socialiste, akuzoi Partinë Demokratike pë qëndrimin destruktiv ndaj Komisionit të Posaçëm të Reformës Zgjedhore, duke dalë hapur kundër detyrave të Bundestagut gjerman.

“Keqardhje për qëndrimin vijues destruktiv të Partisë Demokratike ndaj Komisionit të Posaçëm të Reformës Zgjedhore, duke dalë hapur kundër detyrave të vendosura nga Bundestagu gjerman.  Lidhur me Reformën Zgjedhore, Bundestagu kërkon që “të merret vendim për reformën zgjedhore në përputhje të plotë me rekomandimet e OSBE/ODIHR, sigurimi i një financimi transparent të partive dhe fushatave zgjedhore si dhe të bazohet në rezultatet e Komisionit ad-hoc të Reformës Zgjedhore”. E qartë kristal: vetëm përmes përfshirjes në Komision duhet të vijojë puna për përmbylljen e kësaj Reforme,” tha Taulant Balla duke i bërë të qartë PD se padyshim që është i domosdoshëm konsultimi i të gjithë partive politike, por Kodi Zgjedhor do të kalojë përmes Komisionit dhe më pas në Parlamentin e Shqipërisë, duke iu përgjigjur kështu Partisë Demokratike e cila përmes Sekretarit të Përgjithshëm, Gazment Bardhi i cili tha se Reforma Zgjedhore nuk është dhe nuk mund të jetë çështje e Parlamentit të Shqipërisë.

Ndryshe, Taulant Balla tha sot në Elbasan se secila prej 5000 organizatave socialiste në territor do të bashkëdrejtohet nga një burrë dhe një grua.  Më 16 Nëntor votohen sipas parimit 1 anëtar 1 votë delegatët e Kongresit të PS. Janë ngritur komisionet e zgjedhjeve në PS për çdo bashki dhe njësi administrative.