Vendimi i Gjykatës Supreme detyron KQZ-në të numëroj votat e Diasporës
Komisioni Qendror i Zgjedhjeve, KQZ, në mbledhjen e sotme ka diskutuar për vendimin e Gjykatës Supreme për numërimin e fletëvotimeve të votuesve jashtë Kosovës, me ç’rast u tha se ky aktgjykim është obligues për KQZ.
Kryetarja e KQZ-së, Valdete Daka, u shpreh se në bazë të aktgjykimit të Gjykatës Supreme janë të obliguar që të numërojnë fletëvotimet e votuesve jashtë Kosovës. “Jemi të obliguar ta zbatojnë këtë vendim të Gjykatës Supreme.”
Anëtari i PDK-së në KQZ, Ilir Gashi, tha se me këtë vendim të Gjykatës Supreme po ndryshon ligji për zgjedhjet e përgjithshme.
Edhe anëtari i LDK-së në KQZ, Sami Hamiti, deklaroi se ky vendim është në kundërshtim me ligjin për zgjedhjet. Madje, ai ka ironizuar duke thënë se mos ka mbetur edhe ndonjë pako në Merdarë.
Kurse, anëtari i VV-së në KQZ, Adnan Rrustemi, vendimin e Gjykatës Supreme e ka quajtur të drejtë.
Në këtë mbledhje të KQZ-së, Besnik Buzhala nga Divizioni i Shërbimit të Votueseve, ka bërë të ditur se janë edhe 1 mijë e 806 fletëvotime të ardhura pas afatit, për çka ka kërkuar që të dijë se çka do të bëhet me to. Ai tha se arsyeja e vonesës së tyre është e njëjtë sikurse e 4 mijë e 639 fletëvotime për të cilat ka marrë vendim Gjykata Supreme që të numërohen.
Kryetarja e KQZ-së, Valdete Daka tha se nuk do të marrin vendim për këto vota, por që u shpreh se i mbetet shërbimit të votuesve që të vendos se çka të bëhet me to.
Po ashtu, në këtë mbledhje KQZ ka marrë vendim për plotësim të vendimit mbi caktimin e lartësisë së mjeteve nga fondi për mbështetjen e subjekteve politike për vitin 2019, ku Komisioni Qendror i Zgjedhjeve lejon transferimin e fondeve nga fondi për mbështetjen e subjekteve politike, për financimin e aktiviteteve të rregullta të subjekteve politike vetëm deri në datën e certifikimit të rezultateve të zgjedhjeve të parakohshme për Kuvendin e Kosovës të mbajtura me 6 tetor 2019.
Ky vendim është miratuar me 6 vota për, 1 kundër dhe dy abstenime.
Kundër këtij ka votuar kryetarja e KQZ-së, Valdete Daka, që sipas saj partitë nuk kanë të drejtë t’i marrin këto mjete.
Sa i përket kësaj teme, drejtori ekzekutiv i zyrës për regjistrim të PP-ve dhe certifikim Yll Buleshkaj, bëri të ditur se legjislacioni jep formulën që duhet të ndahen në bazë të rezultateve të certifikuara të zgjedhjeve paraprake, e që sipas tij deri tani nuk ka certifikim të zgjedhjeve të reja, atëherë duhet të vazhdohet me formulën e cila është ekzistuese.
