Rilindja e terrorizmit komunist

nga Nebil Çika

29 vjet pas rënies de jure të diktaturës komuniste qeveri shqiptare dhe Bashkia e Tiranës kanë provokuar rëndë popullin dhe kombin shqiptar duke e mbushur bulevardin me foto të dëshmorëve komunistë një pjesë e mirë e të cilëve kanë qenë terroristë të mirëfilltë politik, kjo e provuar me dokumente historike të arkivave shqiptare e të huaja.

Kjo “ekspozitë” publike e krimit komunist në Shqipëri është një nga momentet me të sinqerta të qeverisës ish komuniste shqiptare e cila tashmë ka hequr çdo maskë “demokratike” duke u deklaruar hapur me krenari si vazhdimësi 75 vjeçare e komunizmit terrorist shqiptar. Nuk i pashë të gjithë emër për emër “dëshmorët” komuniste që Veliaj e Rama u kanë varur fotot në bulevard, por më tërhoqën vëmendjen disa prej tyre që janë shpallur dëshmorë pa asnjë kontribut për popullin e kombin tonë, përkundrazi u kanë shkaktuar dëme shumë të mëdha shqiptarëve dhe janë autorë të krimeve të rënda si krime lufte, kundër njëzimit dhe gjenocid. Pash atje një terrorist të njohur komunist, Mustafa Xhani i njohur si Baba Faja i Martaneshit i vrarë më 18 mars 1947, nga Kryegjyshi Botëror Bektashian, Dede Hilmi Abazi i cili i kërcënuar nga Mustafa Xhani dhe Fejzo Dervishi që i kërkonin që ai të pranonte këto politikat e komunizmit mbi fenë ose të përballej me represionet nga qeveria e Enver Hoxhës pjesë e të cilës ishte Mustafa Xhani si Nënkryetar i Frontit Demokratik dhe zëvendëskryetar i Kryesisë së Kuvendit Popullor.

Në kujtimet e tij veta diktatori Enver Hoxha shkroi si ai ishte një komunist gjë që binte në kundërshtim me detyrën e tij fetare “Gjatë luftës ai më kërkoi ta pranonim si një anëtar të Partisë Komuniste :
E.H: “Unë jam i sigurt se nuk besoni në fe, por besoni vetëm në Partinë”
M.XH: Për Partinë unë do të hedh poshtë rrobat e mia klerike”, në të cilën Hoxha u përgjigj, “Jo, ju duhet të rrini në rrobat që vishni. Partinë, respektojeni dhe zbatoni rregullat e saj dhe ne do t’ju pranojmë si anëtare të Partisë“, dhe ai u bë anëtar.

Me që kemi dëgjuar shpesh Ramën dhe Veliajn të pretendojnë se komunistët ishin me aleatët Anglo Amerikanë në LDB dua të theksoj se mendimi i aleatëve për Xhanin ishte tejet negativ.

David Smiley, oficer i misionit britanik e përshkruan Mustafa Xhanin si një “faqezi” i cili kënaqej duke shkuar me femra, dhe kënduar këngë partizane me zërin e tij pas pirjes së rakisë. Në dokumentet e arkivave britanike ai cilësohet si komunist, terrorist imoral, hajdut që u vodhi edhe rrobat e materiale të tjera edhe oficerëve të misionit anglo-amerikan në Shqipëri. Më thoni vetëm një cilësi pozitive të Mustafa Xhanit se për kontribute në shërbim të atdheut kushtet ligjore për tu bërë dëshmorë nuk bëhet fjale. Fakti që u vra nga një klerik i nderuar, për shkak se donte të ndalonte në emër të komunizmit besimin në Zot, 3 vjet mbas mbarimit të luftës, flet vetë për motivet ideologjike komuniste dhe të promovimit të terrorizmit të ekspozimit të fotografisë së tij dhe të terroristëve të tjerë komunist nga Rama e Veliaj në bulevard .

Një tjetër “ dëshmor” komunist që nuk ka asnjë lidhje me kontributet e luftës për atdhe është Memo Meto, komunist dhe komisar politik i vrarë për çështje nderi nga bashkëfshatari i tij Arap Lilo, në 1 prill të vitit 1944 në Kuç të Vlorës.

Memo Meto njihej në zonë si imoral dhe të gjithë e dinë motivin “për nder “të vrasjes së tij. Në historiografinë komuniste thuhet se “ai u vra në një pritë të madhe” ndërkohë që ai që i vrau ishte vetëm një person bashkëfshatar i thjeshtë i tij dhe këta dy partizanë “trima” komandant e komisar batalioni. Arap Lilo komisarin Memo Meto e Vrau ndërsa komandantin Barjam Korvrafa e la të lirë pasi nuk kishte ndonjë gjë me të, duke dëshmuar kështu motivet personale e familjare të aktit të tij.

Por figura e Memo Metos lidhet me krime të tmerrshme të komunistëve pas vrasjes se tij. Sipas të dhënave empirike, rreth 105 persona midis tyre dhjetëra fëmijë e gra shtatzëna, pjesëtarë të familjeve të nacionalistëve antikomunistë të zonës. Nga kjo lemeri e kryer mbi varrin e tij në shenjë hakmarrje nga komunistët, emri i Memo Metos u bë edhe simboli i terrorizmit komunist në Jug të vendit e më gjërë, gjë që vazhdon edhe sot.
Një rast tjetër glorifikimit dhe promovimit të terrorizmit komunist janë pa dyshim te: ”dëshmorët” komunistë shqiptarë të Luftës së Spanjës. Ky është një rast tipik i glorifikimit të terrorizmit ndërkombëtar nga komunistët shqiptar dje dhe sot, 9 komunistë të vrarë në Luftën Civile në Spanjë në vitin 1937 janë dëshmor te atdheut:
Asim Vokshi,
Dhimitër Kosta,
Musa Fratari,
Ramiz Varvarica,
Teni Konomi,
Thimo Gogozoto,
Urfi Agolli,
Xhemal Kada,
Zef Hoti .

Më thoni cilat nga kriteret e marrjes së statusit dëshmor plotësojnë këta terroristë që u dekoruan, si luftëtarë me pagesë nga Internacionalja Komuniste dhe Bashkimi Sovjetik për të vendosur diktaturën komunistë në Spanjë. Këta janë turpi e faqja e zezë e jona. Kanë kryer në emër të komunizmit krime të rënda kundër popullit spanjoll dhe shteti shqiptar vazhdon ti nderojë e të shpërblejë si dëshmorë të Shqipërisë. Kjo është sikur shteti shqiptar të shpallë sot dëshmor dhe Rama me Veliaj t’iu varin fotot në bulevard, terroristëve shqiptarë të ISIS të vrarë në Siri e Irak. Ka ndonjë që mund ta shpjegojë apo ta justifikojë këtë përveçse motivimit të qeverisë aktuale për të na kthyer tek terrorizmi politik komunist.

Po patëm kohë e nge një herë tjetër mund të flasim edhe për të tjerë “dëshmorë“ komunistë që ose janë autorë të krimeve të komunizmit ose nuk kanë asnjë lidhje me statusin e dëshmorit të atdheut, por besoj se këto raste që folëm e bëjnë të qartë që në ekspozita në bulevard është një nderim dhe promovim qeveritar terrorizmit politik komunist në Shqipëri.

Nuk kam pritur dhe nuk pres që komunistët të heqin dorë me vullnet nga terrorizmi si histori e si aktualitet por shpresoj që shfaqje të tilla publike të terrorizmit dhe terroristëve të përmendin ata shqiptar që ende besojnë e shpresojnë se komunistët mund të reformohen. Prova më e madhe për ta, ne dhe gjithë botën se Shqipëria është në luftë të ftohtë civile  është tashme e shfaqur publikisht nga qeveria në Bulevardin Dëshmorët e Kombit si “rilindje” e terrorit komunist. Shpresoj shumë që kësaj radhe, këtë ta ketë vënë re edhe Lul Basha.