Tetë shqiptarë tentuan të hyjnë në Angli me jaht luksoz

Autoritetet britanike kanë kapur 8 shtetas shqiptarë në një jaht luksoz, me të cilin dyshohet se janë kontrabanduar. Jahti luksoz u gjet në brigjet e Britanisë së Madhe nga Forcat Kufitare dhe një helikopter dhe më pas u shoqërua në bazën detare të Portsmuth në Hampshire.

Tetë shtetasit shqiptarë do të trajtohen në përputhje me rregullat e emigracionit të Mbretërisë së Bashkuar ndërsa kapiteni i jahtit, një 64-vjeçar britanik u ndalua nga policia dhe është marrë në pyetje.

“Goditja e grupeve kriminale të përfshira në kontrabandë njerëzisht është një nga prioritetet tona,” tha një zyrtar  i Agjencisë Kombetare të Krimit duke shtuar se po bashkëpunojnë me partnerët për zbatimin e ligjit për mbrojtjen e kufijve.

“Drejtuesi i anijes, një shtetas 64-vjeçar britanik, është arrestuar me dyshimin se po përpiqet të lehtësojë shkeljen e ligjeve të imigracionit dhe tani po merret në pyetje nga hetuesit e NCA. Anija po ekzaminohet në bazën detare të Portsmouth,” ka sqaruar zëdhënësi i NCA.

Ndalimi i tetë shqiptarëve vjen pas arrestimit të 8 personave nga policia vietnameze në lidhje me 39 migrantët e gjetur të vdekur në një kamion në Essex. Arrestimi i tyre u bë nën dyshimin e organizimit të njerëzve që kontrabandonin jashtë shtetit.