75 vjetori i Masakrës Komuniste të Tiranës, nesër në orën 10:00 Homazh dhe Protestë!

Nesër më 17 Nëntor 2019 ora 10:00, në përkujtim të Masakrës Komuniste të Tiranës të Nëntorit 1944, ku komunistët rrëmbyen nga shtëpitë e tyre dhe vranë pa gjyq dhjetëra intelektualë e patriotë të shquar shqiptarë, Shoqata Antikomuniste e të Përndjekurve Politikë organizon Homazh dhe Protestë tek Memoriali i terrorit komunist në Tiranë pranë Institutit të të Përndjekurve Politikë.

Lista e përgatitur nga Enver Hoxha dhe emisarët komunistë jugosllavë ju dërgua për ekzekutim kreut të Qarkorit Komunist të Tiranës, Gogo Nushi.

Në listat e gjetura në Arkivin e Shtetit figuronin 105 emra, por Shoqata Antikomuniste e të Përndjekurve Politikë thekson se ka arritur të identifikojë vetëm 36 prej tyre.

Duke shfrytëzuar tërheqjen e forcave gjermane, bandat komuniste që pretendojnë të jenë “çlirimtarë”, futeshin natën nëpër shtëpitë e Tiranës dhe rrëmbenin intelektualët patriotë që pushkatonin menjëherë pa gjyq.

Kjo masakër është nga më të mëdhatë për nga numri por më e madhja nga cilësia e njerëzve që komunistët kishin zgjedhur për ti vrarë, shkrimtarë, gazetarë, ushtarakë, mësues, biznesmenë të nderuar, u masakruan pa mëshirë nga komunistët gjatë pushtimit prej tyre të kryeqytetit, një valë e pa parë terrori që Tiranës dhe Shqipërisë nuk ja kishte bërë asnjë pushtues tjetër.

Sot kjo masakër është e zbardhur në aspektin historik dhe martirët e sajë janë nderuar me titullin e lartë “Nderi i Kombit “ nga Presidenti i Republikës .
Këto ditë të reagimit tim ndaj paradës se terrorit komunist që qeveria po bën ne Bulevardin Dëshmorët e Kombit me portretet e autorëve te kësaj masakre, dhe qindra të tjera në të gjithë vendin, shumë të përndjekur politikë dhe antikomunistë, kanë kërkuar organizimin e një proteste.

“Nuk ka ditë e moment më simbolik për reagimin tonë ndaj revanshit komunist të përkujtimi të kësaj masakre, një krim i mirëfilltë lufte i kryer nga ata që sot qeveria i nderon si çlirimtarë,” thekson Kryetar i Shoqatës Antikomuniste të Përndjekurve Politikë, Nebil Çika, i bënë thirrje të gjithë të përndjekurve politikë, antikomunistëve dhe shqiptarëve të tjerë që nuk kanë lidhje me komunizmin dhe krimet e tij:

“Të jemi të gjithë bashkë në 17 nëntor, ora 10:00 tek Memoriali i terrorit komunist në Tiranë pranë Institutit të të Përndjekurve Politikë! Të gjithë bashkë me qytetari e fisnikëri, kundër revanshit komunist komunistëve, të bijve të etërve autorë të krimeve kundër njerëzimit!”