“Edi Rama: Shëndetësia falas”/ Reagimi, Bardh Spahia: Hajn dhe i pacipë!
Pasi Kryeministri Edi Rama gjatë prezantimit të Paketës Speciale AntiKÇK nuk e pranoi se shëndetësia është në gjendjen e mjerueshme por tha se akuzat vijnë nga një pjesë e trupës së bluzave të bardha që njollosin këtë bluzë, reagoi Ish-Deputeti i Partisë Demokratike, Bardh Spahia, duke e konsideruar si një pacipësi olimpike të Kryeministrit ndërsa rendit mungesën bazike që ka shëndetësia
“Pacipësi olimpike e një kryeministri që thotë se është investuar 38 milionë euro për koncesione, por nuk shpjegon se si prej disa ditësh tek Okulistika nuk punohet se nuk ka sutura (penj për qepje), sutura që për hir të së vërtetës ka 5 vite që mjekët i blejnë vete nga xhepi i tyre!
Kaq mungesa bazike ka shëndetësia, thekson Bardh Spahia, pasi paratë e taksave të shqiptarëve shkojnë për PPP-të për punë që nuk bëhen!
“E paturpësisht kllouni-kryeministër thotë se qytetarët i marrin shërbimet falas se koston e ka shteti! Nga i merr lekët ky shteti që paguaka për qytetarët? Si mund të lëshosh një broçkull të tillë pa u skuqur e pa t’u dridhur qerpiku?!’ thekson Ish-Deputeti i Partisë Demokratike, Bardh Spahia, në reagimin e tij përmes rrjetit social Facebook, duke përfunduar:
“Vetëm një psikopat i babëzitur mund të zhysë në borxhe edhe brezat e ardhshëm me koncesione korruptive që si rezultat kanë edhe mungesa të mjeteve e paisjeve me bazike ne shëndetësi.”
Ndryshe, gjatë prezantimit të Paketës Speciale AntiKÇK, Kryeministri Edi Rama duke iu përgjigjur një reagimi qytetarë që thuhej se vinte në kohë reale nga rrjetet sociale se “njerëzit po vdesin për bukë, në spital të lënë të vdesësh po nuk u dhe lekë, prisnim shumë, por edhe ju si gjithë të tjerët,” mohoi ekzistencën e këtyre rasteve dhe akuzoi bluzat e bardha ndërsa foli me superlativa për investimet e kësaj qeverie në shëndetësi ndonëse nuk e bëri as falas dhe as efektive:
“Nuk është e vërtete që të lënë të vdesësh po nuk dhe lekë kur shkon te mjeku dhe nëse ka një të vërtetë të pamohueshme që në trupën e bluzave të bardha ka të tillë që e njollosin këtë bluzë, e vërteta tjerët është se këta janë pakicë. E them me bindje se e ndjek çdo ditë!”
