Pas tërmetit, FSK niset drejt zonave të dëmtuara në Shqipëri

Pas tërmetit të fuqishëm të orës 03:54 me magnitudë 6.4 të shkallës Rihter dhe qindëra pasgoditjeve ndërsa raportohet jozyrtarisht se 12 persona kanë mbetur të vdekur dhe ekipet e kërkim-shëtimit vazhdojnë betejën me rrënojat, Ministri në detyrë i Mbrojtjes së Kosovës, Rrustem Berisha, duke shprehur ngushëllime dhe keqardhje për familjarët e viktimave dhe Qeverinë e Shqipërisë, ka bërë të ditur se ka nënshkruar vendimin për nisjen e menjëhershme të njësisë së kërkim-shpëtimit të FSK-së, për të ndihmuar autoritetet shqiptare pas tërmeteve.

”Sapo jam informuar edhe zyrtarisht nga autoritetet shqiptare për tërmetin dhe pasojat e tërmetit në Shqipëri. Fatkeqësisht, tërmeti ka shkaktuar edhe humbje jetësh dhe dëme të mëdha materiale. Ne u shprehim ngushëllimet më të sinqerta dhe keqardhje e thellë familjarëve të viktimave dhe Qeverisë së Shqipërisë, duke treguar gatishmërinë tonë për të dhënë ndihmë në këtë situatë. Si Ministër i Mbrojtjes, kam nënshkruar vendimin për nisjen e menjëhershme njësisë së kërkim-shpëtimit të Gardës Kombëtare të Kosovës, FSK, bashkē me njësitë e specializuara K-9 për në zonat e prekura nga tërmeti”.