VV-LDK, Kurti: Marrëveshja e koalicionit qeverisës ditët në vijim
Lëvizja Vetëvendosje dhe Lidhja Demokratike e Kosovës brenda disa ditëve do të përmbyllin marrëveshjen për koalicionin e ardhshëm qeverisës. Kryetarët e këtyre dy partive, Albin Kurti dhe Isa Mustafa, u shprehën të bindur pas takimit se doemos qeveria e ardhshme do të formohet nga paritë e tyre dhe se harmonizimi i programeve pothuajse është i përfunduar.
Një ditë pas certifikimit të rezultateve nga KQZ, përkundër festës së 28 Nëntorit, dy partitë fituese të zgjedhjeve të 6 tetorit për dallim nga herët e kaluara, u takuan sot brenda objektit të Parlamentit të Kosovës. Në takimin prej rreth dy orësh, përkundër vullnetit për koalicion, nuk u dhanë detaje mbi diskutimet e ndarjen e ministrive dhe çështjet tjera.
Kandidati për kryeministër, partia e të cilit ka fituar zgjedhjet e 6 tetorit, Albin Kurti tha se takimi i sotëm ka qenë konstruktiv dhe njoftoi se në takimin e nesërm pritët të përmbyllin të gjitha çështjet e mbetura.
“Në pak ditë në vijim do të lidhin marrëveshjen për koalicionin qeverisës në legjislaturën e shtatë të Kuvendit të Kosovë, të dal nga zgjedhjet e 6 tetorit të këtij vitit. Takimi ishte shumë konstruktiv, i konfirmuam të gjitha dakordimet që i kemi bërë deri më tani sa i përket harmonizimit programor. U morëm vesh që nesër është takimi i radhës për t’i përmbyllur çështjet e ngelura nga dy ekipet tona të profesionistëve. Gjithashtu u dakorduam që do të takohemi intezivisht ne dy kryetarët e dy subjekteve, sepse doemos do të bëjmë marrëveshjen, e cila do të shënojë një kapitull të ri në Kosovë. Me një kulturë të re qeverisëse, me një program zhvillimor për drejtësi ligjore dhe sociale. Për integrime Evropiane, duke i dhënë prioritet qytetarit të Republikës pa dallim.”
Duke i uruar fitoren Kurtit, kryetari i LDK-së tha se harmonizimi i programit të dy partive po thuajse është përfunduar, teksa u shpreh se do të mbetët në kontakte të rregullta që brenda këtyre ditëve të përcaktohen edhe ndarja e përgjegjësive qeverisëse.
“Ne patëm një takim, ashtu siç tha zotëri Kurti shumë të frytshëm, konkret, konstruktiv dhe përmbajtjesor. Para gjithash unë ia urova edhe brenda, po ia uroj edhe para jush fitoren dhe radhitjen e VV-së si parti e parë në këto zgjedhje. Po ashtu edhe besimin që VV dhe LDK kanë marrë nga qytetarët si besime të domosdoshme, që duhet të ndodhin në qeverisjen e ardhshme në përmirësimin e jetës ekonomike, sociale dhe shtetit ligjor në Kosovë. Ne konstatuam se ajo çfarë është punuar në grupet punuese gjatë kësaj kohe në përafrimin dhe harmonizimin thuajse është përfunduar. Ka mbetur edhe nesër të definohet përfundimisht. Ne u pajtuam për çështjet që duhet të përfundojnë. Ndërkaq ne shohim arsye të plotë, shohim vullnet nga dy palët që të vazhdohet intezivisht që të mbahen kontakte të rregullta, në mënyrë që të përcaktojmë edhe përgjegjësitë tona në qeverisjen e ardhshme, me qëllim që ajo të jetë e suksesshme.”
Në certifikimin e rezultateve të zgjedhjeve të 6 tetorit, Lëvizja Vetëvendosje ka dal e para, e pasuar nga LDK, derisa ka mbi një muaj që dy grupet e punës të partive kanë harmonizuar programin e ardhshëm qeverisës.
