Lëkundjet nuk kanë të ndalur, panikun e “zëvendëson” lodhja…

Pas një nate relativisht të qetë, tre lëkundje të fuqishme goditën sërish Durrësin dhe Tiranën mëngjesin e sotëm por përkundër panikut ndër qytetarë ai nuk u reflektua në rrugë, pasi në ditën e gjashtë me lëkundje të mëdha, qytetarët tashmë e pranojnë se janë lodhur me tërmetin dhe janë pajtuar me fatin.

Qendra Sizmologjike Mesdhetare, EMSC, ka raportuar për një tërmet në orën 7:04 minuta me magnitudë 4.2 të shkallës Rihter, thellësi 10 km dhe epiqendër 17 km afër Mamurrasit dhe 35 km afër Tiranës.

Tërmeti i dytëu regjistrua në orën 07:52 minuta me magnitudë 3.4 të shkallës Rihter dhe thellësi vetëm 5 km, 28 km afër Durrësit dhe 44 km nga Tirana.

Tërmeti i tretë që filloi të shqetësoi qytetarët ishte ai i orës 8:18 minuta me magnitudë 3.7 të shkallës Rihter dhe thellësi 10 km që sipas EMSC ishte me epiqendër 19 km afër Durrësit dhe 45 km afër Tiranës.

Ndryshe, si pasojë e tërmetit tragjik të 26 Nëntorit, 51 qytetarë kanë mbetur të vdekur dhe 900 janë plagosur ndërsa dëmet materiale janë shumë të mëdha dhe ka filluar vlerësimi i tyre.