Haziri: Nëse nuk zgjidhet çështja e Presidentit, LDK shkon në opozitë

Nënkryetari i Lidhjes Demokratike të Kosovës, Lutfi Haziri tha se mes LDK-së dhe Lëvizjes Vetëvendosje janë pritur situata të tilla ku do të ketë mosmarrëveshje.

Lutfi Haziri për TV Dukagjini tha se edhe disa probleme që janë mes LDK-së dhe Lëvizjes Vetëvendosjes do të tejkalohen nga dy liderët e këtyre subjekteve.

“Janë disa opsione që janë diskutuar dhe liderët janë duke u munduar të adaptojnë rolin e partive të tyre. Secili e ka të qartë se nuk merr më shumë se ajo që i takon,” tha ai.

Nënkryetari i Lidhjes Demokratike të Kosovës tha se nuk kanë arritur në një pikë që të thuhet “merre ose lë” dhe ka shtuar se partisë së parë i takon të ofrojë opsionin e fundit “merre ose le”.

Sipas tij nëse Lëvizja Vetëvendosje thotë se ka ardhur ai moment, ne do të vendosim për pozicionin tonë.

Nëse Vetëvendosje nuk pranon të zgjidhet tani çështja e presidentit, Haziri tha se LDK do të shkojë në opozitë.

“Ne nuk pranojmë opsione të tjera të zgjidhjes së problemit, që del jashtë këtij formati të bisedimeve,” tha Nënkryetari i Lidhjes Demokratike të Kosovës, Lutfi Haziri, duke shtuar se personalisht ai nuk ka ambicie për president apo ndonjë post qeveritar, pasi ka obligime ndaj qytetarëve të Gjilanit.