“Reçaku trillim”/ Vuçiç dhe Lista Srpska reagojnë pas dënimit të Teodosijeviçit

Kryetari i Listës Srpska, Goran Rakiç tha se në rast se aktgjykimi ndaj ish-ministrit Ivan Teodosijeviç, bëhet i plotëfuqishëm, atëherë do të ftojë serbët që të dalin nga institucionet e Kosovës. Thirrja për të lënë vendet e punës, raporton RFE, do t’iu bëhet të gjithë përfaqësuesve të pakicës serbe në Kosovë.

Ndryshe, Ish-ministri i Administratës dhe Vetëqeverisjes Lokale në Qeverinë e Kosovës, Ivan Teodosijeviç, u dënua sot në Gjykatën Themelore në Prishtinë me dy vjet burgim për një deklaratë të bërë në mars, me rastin e 20-vjetorit të bombardimeve të NATO-s në caqet e ish-ushtrisë jugosllave – fushatë kjo që i dha fund luftës në Kosovë.

Me atë rast, Teodosijeviç tha se “arsye për agresionin e NATO-s ka qenë e ashtuquajtura katastrofë humanitare në Kosovë dhe masakra e trilluar e Reçakut”.

Lidhur me dënimin e politikanit serb të Kosovës, ka reaguar edhe presidenti i Serbisë, Aleksandar Vuçiç, duke e quajtur vendim të frikshëm. Dhe jo vetëm kaq! Vuçiç, kriminel po aq sa Teodosijeviç tha se sa i përket Reçakut në vitin 1999 “bëhet fjalë për krim të trilluar, dhe se gjithçka ishte trillim i një mashtruesi, siç është William Wolker”.

“Këtë do ta përsëris çdo ditë dhe të shohim se kush do të na gjykojë,” tha Ish-Ministri i Millosheviçit dhe aktualisht President i Serbisë, Aleksandar Vuçiç, deklaratë e cila u dënua ashpër nga Presidenti i Kosovës, Hashim Thaçi dhe kryeministri në detyrë, Ramush Haradinaj.

Masakra e Reçakut, njihet si një nga ngjarjet që ka shënuar kthesë në diplomacinë ndërkombëtare në raport me Serbinë dhe Kosovën, duke u paraprirë proceseve që çuan te fushata e bombardimeve të NATO-s kundër caqeve ushtarake të Serbisë.

Vrasja e 45 civilëve shqiptarë nga forcat paramilitare serbe.në Reçak ishte cilësuar “krim kundër njerëzimit” nga ish – shefi i Misionit Verifikues në Kosovë, ambasadori William Walker